Llsgr. Caerdydd 1.363 (Hafod 2) – tudalen 143r
Brut y Brenhinoedd
143r
enys ac ymlad ar pobyl ar ryỽelỽ ar+
nadỽnt. Ar rey henny a ỽynassey ỽthyr
ỽrenyn eỽ herlyt pey na|s llwdey e tyws+
sogyon ef kanys trymach wu y heynt o la+
wer gwedy e wudỽgolyaeth honno noc e
bỽassey gynt. Ac wrth henny o bop fford
glewach oedynt e gelynyon en keyssyaỽ
darestwng e teyrnas ỽdỽnt. ac ymrody a
orỽgant y eỽ kynneỽodyc ỽrat wynt a
medylyaỽ pa|wed e gellynt o ỽrat llad e
brenyn. Ac gwedy na cheffynt ansaỽd a+
rall. llwnyethỽ a orỽgant y lad a gwen+
wyn. a henny a gwnaethant. kanys hyt tra
edoed e brenyn en verolan en glaf er hon
a elwyr er aỽrhon seynt alban wynt a
ellyghassant kennadeỽ en ryth aghanogy+
on y syllw ansaỽd e llys. Ac gwedy gwelet a
dyskỽ o|r rey henny pob peth o ansaỽd e llys.
ỽn peth a dewyssassant y|eỽ brat kanys en
agos er neỽad ed oed ffynnaỽn gloew. ac o
honno e gnotaey e brenyn yỽet dwfyr oer
pryt na chaffey enteỽ blas ar dyaỽt o lynn
arall en|e byt rac y heynt. Ac wrth henny
| « p 142v | p 143v » |