Llsgr. Caerdydd 1.363 (Hafod 2) – tudalen 98v

a|e galw en ankret noc en cret dolwr yw kenhyf. Oc

ech dyvodedygaeth chwytheỽ pa damweyn bynnac

a|e dydyko llawen yw kenhyf kanys en amser cryno

e devthavch na dyw na peth arall ac ech anvonho.

kanys veg gelynyon o pob parth esyd em kywar+

ssangv ac ym goỽalỽ en vavr en er amseroed hynn.

Ac o mynnỽch chwythev kymryt kytlafvr er eml+

adev henny y gyt a nynhev; my ac ech kymeraf en w+

yr ym ac ach kynhalyaf en e teyrnas y gyt a my en an+

rydedvs ac o amravalyon rodyon ac ech kyvoethogaf

ac o tyred. Ac en e lle vfydhaỽ a orvgant ac emkadarn+

hav ac ef a thrygaỽ en wyr llys ydav. Ac en e lle e nachaf

e ffychtyeyt en kynnỽllaỽ llw mavr ac en dyvot ac en de+

chreỽ ameythyaỽ e gwladoed kanthvnt e fford e kerdynt. Ac

gwedy kennattav henny y ortheyrn enteỽ a kynnỽllwyvs y

holl varchogyon enteỽ ac a devth trwy hvmyr en eỽ herbyn.

Ac odyna gwedy ev dyvot en kyvagos e kywdavtwyr o|r neyll

parth ar gelynyon o|r parth arall en dyannot dechreỽ emlad kalet

gwychyr a wnaethant. Ac ny bv reyt yr brytanyeyt dym

llafvr hayach en er emlad hvnnv. kanys e saysson a emladas+

sant en vravl ac en wychyr megys e kymhellassant ar ffo.

e gelynyon a nocheynt gorchyvygv a gorvot kyn no henny.