Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 16r
Ystoria Lucidar
16r
aeith yntev y anghev. Paham na diuawyt yn+
tev yna o|gwbyl. Ny allỽyt symudaỽ gossodediga+
ethev duỽ. kannys o genedyl adaf yd aruaeth+
aỽd kỽpplav rif yr etholedigyon. Beth a|wnaeth
yntev am dỽyn ohonaỽ y|gann duỽ y anreded
heb y|talu. Yna y byrrỽyt yntev ym|poenyev.
A|e anryded gann duỽ poeni dyn. nev pa wed y
mae. Am tremygv ohonaỽ melyster y dat yn|y
gogonyant. Am hynny y symudaỽd yntev me+
gys gwas gỽrthgas y|vot ef yn|duỽ pann boenet.
Paham na madeuei duỽ idaỽ yntev ac ef yn dru+
garaỽc yr hynn ny allei y|dalu. peis gwnelei ef
a dyỽedut y|vot yn annalluaỽc. A|phei kymerei
ef pechadur o|dyn yn diboen yg·ogonyant. A|bỽ+
rỽ ohonaỽ angel o|e achaỽs vn medwl yg|kyfyr+
goll. agkyfuyaỽn vydei yr hynn ny allei vot.
Ac nyt edewit dim yn teyrnnas nef heb y|lun+
eithaỽ. Ac vrth hynny dylyedus uu poeni pech+
adur. kanny dodei nep yn|y dryzor gem wedy
dygwydei yn|y tom yny glanhaei yn gyntaf.
Beth a daruu yn|y diwed idaỽ ef. kilyaỽ a|oruc
a megys gwas foaỽdyr a da y arglỽyd yn|lledrat
gantaỽ hyt ar|vrenhin kreulaỽn. Yna yd an+
vonet mab y brenhin o|r llys anrydedus yn ol
y|gvas alltut. Ac y|ystỽng y brenhin kreulaỽn.
| « p 15v | p 16v » |