Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 80v
Ymborth yr Enaid
80v
drỽc ac na|s mynnych mỽy noc yt dy|hun. Ac
a|vynnut y|ry|buchyaỽ yt dy|hun y|vynnv idaỽ
yntev. Ac na ettych arnaỽ ormod gỽall nac ei+
sseu moe nac arnat dy|hun hyt y|gellych yn
gyfyaỽn y|amdiffynn megys nat ymlycrych
dy|hun yn ormod o|e garv ef yn|vỽy no|thi dy
hun. hyt na ettych dim ar|dy helỽ y|achub dy
agheu dy|hun heb y|rodi vrth y|aghen ef. kanys
ny dylyy di garu neb yn vỽy no|thi dy|hun. na+
myn duỽ. kyt ys|kerych yn gymeint a|thi dy
hun. Dy|gyfnessaf yỽ pob vn o|ffydlonyon crist.
Sef yỽ hỽnnỽ pob cristyaỽn ffydlaỽn. Ac ynn
bennaf paỽb o|r a|wnaeth da ytt. kyt bych mỽy
mỽy rỽymedic y|th ryeni a|th gereint noc y
estronnyon. Ac yn voe y|th rỽymir y|garv dy
ryeni a|th gereint ysprydolyon megys eglỽys+
sỽyr. A|chreuydỽyr. noth ryeni a|th gereint
knaỽdolyon. megys y|mae pennach yr yspryt
no|r knaỽt. Ac ynn bennaf o|hynny od|ỽyt gre+
uydỽr dy gytgreuydỽyr. a|th|dadeu ysprydolyon.
Pob ryỽ garyat arall o|r a|dotter ar greadur
arall eithyr a|garer yr duỽ. ynvytserch yỽ. Ac
ny henyỽ o|wrchyon yr|yspryt glan. Ac vrth
na henyỽ o|gylch y|drindaỽt yr hỽnn ysyd bop
ryỽ beth. ar|dim y|troir. a|chyt a|dim y kollir.
| « p 80r | p 81r » |