LlGC Llsgr. Llanstephan 27 (Llyfr Coch Talgarth) – tudalen 29v
Ymborth yr Enaid
29v
a|del o vrevolyaeth medỽl. Dryc·annyan yỽ. ardangos ar+
dangos ar|wyneb. ac ymdygyat gỽarchaedic chwerỽder ma+
rỽolyaeth medỽl. ỻovrudyaeth yỽ keing o|irỻoned a|wneir drỽy
weithret megys pan|lado dyn araỻ yn|weithredaỽl. Chwe ch+
eing yssyd y lourudyaeth. vn yỽ yr honn a dywetpỽyt ỻad
dyn yn weithretaỽl. Eil yỽ cassau araỻ yn varwaỽl. Y dry+
ded yỽ. dryc·ewyỻys y eidunaỽ angeu araỻ hyt na bo arnaỽ
ef na|s ỻedit o|e vod. Pedwared yỽ annidarbot. megys pei
gỽypei dyn vot araỻ yn mynnu ỻad kelein ac na rybudy+
ei y ỻadedic namyn y oỻỽng heibyaỽ heb didarbot y lad. ~
Pymhet yỽ rodi kyngor y lad araỻ. Chwechet yỽ dỽyn ym+
borth y gan eissiwedic. megys pei gỽelei dyn araỻ yn marỽ
o eissyeu. ac na|s|nerthei ac ef yn|y aỻu. ~ ~ ~ ~
D Ywetter beỻach am lesged a|e geingeu. ỻesged yỽ.
mỽygylder medỽl yn gỽeỻygyaỽ gỽneuthur da. neu
yn|blinaỽ rac gorffen y da dechreuedic. neu vlinder yn ymwrth+
lad a|r drỽc. Naỽ keing yssyd y lesged. nyt amgen ergryn. Me+
wyt. ỻetvryt. gỽeỻyc. amprudder. anghaỻder. trymluaỽcrỽyd.
an·wybot. gorwacrỽyd. Ergryn yỽ ovynhau ˄dechreu gỽneuthur da.
Mewyt yỽ. blinder ỽrth orffen y da dechreuedic. ỻetvryt yỽ. o+
vynhau dechreu peth maỽr advỽyn. Gweỻyc yỽ. gỽaỻ am|wne+
uthur y peth a|dylyer y wneuthur yn rỽymedic. amprudder yỽ
na rac·weler am y|petheu a|delont rac ỻaỽ o|r a|aỻer eu rac·welet.
Angkaỻder yỽ gochel ryỽ bechaỽt yny syrthyer yn a·raỻ. ~
Trymluaỽcrỽyd yỽ. ỻesgu o dyn orffen y peth a|dylyo y diwed
yn rỽymedic. anwybot yỽ na rodo dyn y weithret y gỽplau
dim o|r gỽeith a|dylyo y|wneuthur. yn rỽymedic. Gorwacrỽyd yỽ
parablu seguryon eireu yn orỽac.
| « p 29r | p 30r » |