LlGC Llsgr. 3035 (Mostyn 116) – tudalen 79v
Brut y Brenhinoedd
79v
escob gỽynuydedic corffored y gỽyr·da hyny merthyri.
Ac y|cladỽys yn herwyd dedyf cristynogaeth. Yn agos y
gaer garadaỽc yn|y ỻe a|elwir salsburi y|myỽn y|myn ̷+
went geir ỻaỽ manachlaỽc ambri abat. Y gỽr a vu seil+
aỽdẏr ar y vanachlaỽc hono yn gyntaf. Ac ny doeth
gan y brytanẏeit y|r dadleu hỽnnỽ vn arẏf. kanyt oed
yn eu brẏt namyn gỽneuthur tagnefed. Ac ny|the+
bẏgẏnt ỽynteu bot y|m·ryt y|saesson amgen no hyny.
Ac eissoes y doeth y bratwyr tỽyỻwẏr yn aruaỽc. Ac eis+
soes y kerryc a vu amdiffẏn. Jaỽnda|y|r brytanyeit ~ ~
A c yno yr dothoed eidol jarỻ kaer loyỽ. a gỽedy gỽelet
o hỽnnỽ ỻad y getymdeithon veỻy drỽy vrat. Sef
y kafas ynteu paỽl da kadarn. Ac a|r paỽl hỽnnỽ
pỽy bynac o|r saesson a gyfarffei ac ef yny vei vriỽedic
y pen a|e emenhyd y hanuonei parth ac vfern. Ac yna
a|r paỽl bendigeit hỽnỽ y briỽei ef pen vn. y araỻ y
yscỽydeu y araỻ y dỽy·laỽ a|e vreicheu y araỻ y draet a|e
eskeired y ỽrth y gorff Ac ny orffoỽysỽys eidol o|r ruthyr
hono hyny ladaỽd degwyr a|thrugeint a|r vn paỽl hỽnỽ
A gỽedy gỽelet ohonaỽ na aỻei ef e|hun gỽyrthỽynebu*
y|r nifer hỽnỽ. kymrẏt ẏ|ffo a|wnaeth yny doeth hyt y
dinas e|hun. A|ỻawer a syrthỽys yna o|pop parth. Ac eis+
soes yr yskymyn vudugolyaeth hono a gasas* y saeson.
Ac yr hyny eissoes ny ladassant ỽy ỽrtheyrn namyn
y garcharu a wnaethant a chymeỻ arnaỽ rodi vdunt
y dinassoed a|r kestyỻ a|r ỻeoed kadarn yn ynys prydein
yr y eỻỽg Ac yna y rodes gỽrtheyrn vdunt pop peth
yr y|eỻỽg Ac yna y|kymerth y|saeson y gantaỽ lundein a|chaer+
efraỽc a lincol a chaer wynt gan lad eu kiỽdaỽtwyr
megys y|ỻadei vleideu deueit gỽedy a·daỽhei eu bugeil.
| « p 79r | p 80r » |