LlGC Llsgr. Peniarth 11 – tudalen 38v
Ystoriau Saint Greal
38v
beredur pa vn oed ef. Ac ynteu a|dywaỽt mae o lys arthur
y|dathoed. ac yna ỽynteu y·gyt a|griassant arnaỽ. a|phan|gi+
gleu ynteu hynny ef a ymbaratoes yn eu herbyn. o|e am+
diffyn. ac a|erbynnyaỽd y|kyntaf. ac a|e trewis yny vyd dan
draet y varch. a|r march ar y|warthaf ynteu. y ỻeiỻ oỻ a|doe+
thant am y benn ac a|ladassant y varch y·danaỽ. Ac ynteu yna
a|gyvodes yn gyflym ac a|dynnaỽd y gledyf. eissyoes yn erbyn
y saỽl a|oed yno nyt oed weỻ idaỽ hynny no pheidyaỽ. kanys
neur|daroed udunt ymauael ac ef a|e vỽrỽ y|r ỻaỽr. a|diosc y
helym. a|e yssigaỽ yn drỽc yn ỻaỽer ỻe. Ac ỽynt a|e ỻadyssynt
pany bei dyuot ar y traỽs hỽnnỽ y marchaỽc urdaỽl yn|yr
arueu cochyon o|e diffryt ~ ~ ~
A |Phan|weles ef y marchaỽc ym|plith y elynyon y myỽn
perigyl kymeint ac yr|oed. ef a|doeth attunt. ac a|erchis
udunt adaỽ y marchaỽc. Ac yna ef a|drewis vn onadunt yny
vyd yn varỽ y|r ỻaỽr. ac yny dorres y baladyr. a|gỽedy hynny
ef a|dynnaỽd y gledyf. a thrỽy vrathu march y vyny ac y|wae+
ret ef a|guraỽd paỽb yn|y gylch. hyt nat oed neb o|r y kaffei ef
dyrnaỽt arnaỽ nyt elei y|laỽr. Ac ỽynteu pan y gỽelsant ef
yn|taraỽ mor greulaỽn a hynny. nyt arhoyssant arnunt
dim namyn|ffo a|gỽasgaru ar|hyt y fforest heb ymchoelut
yr vn drachevyn. namyn y|tri a daroed y beredur eu|bỽrỽ y|r
ỻaỽr. a|r|deu ereiỻ a vỽryassei galaath. Ac yna galaath rac
y adnabot a|drosses penn y varch dracheuyn parth a|r ỻe teỽ+
haf y gỽelei y fforest. A|phan y gỽeles peredur efo yn mynet
ymeith ueỻy. ef a|dechreuaỽd ỻeuein yn|y ol. ac a|erchis idaỽ
| « p 38r | p 39r » |