LlGC Llsgr. Peniarth 11 – tudalen 94r

a hi a|digỽydaỽd myỽn clefyt yr ys|dwy vlyned. A|gỽedy y bot talym

yn|porthi y heint. ni a|gaỽssam wybot panyỽ clafri a|oed arnei. a gỽe+

dy dyuot hyt yma hoỻ vedygon a|ffussugỽyr y gỽledyd. nyt oed gan yr

un nebryỽ gynghor idi o|e heint. a|thrannoeth y bore ef a|doeth yma

henafgỽr kymen. yr hỽnn a|dywaỽt. pỽy bynnac heb ef a aỻei gael ỻo+

neit dysgyl o waet morwyn wyry o vedỽl ac o|weithret. a|e bot heuyt

yn verch y vrenhin yn dedyfaỽl o vrenhines. a|hynny o|e breich deheu

ac a|e hirei hitheu a hỽnnỽ hi a|gaffei iechyt. Pan glywssam nin  ̷+

neu hynny ni a|ossodassam yn aruer ac yn defaỽt ar y casteỻ hỽnn

nat aei vn vorwyn heb·daỽ o|r bei uerch y vorwyn heb loneit ffiol o|e

gỽaet. ac ar hynny ni a|ossodyssam wercheitweit ar y ffyrd. a|ỻy  ̷+

na gỽedy dywedut y chỽi yr aruer a|oed yma. ac am hynny chỽi a|w  ̷+

neỽch yr hynn a|vynnoch ae talu yr aruer ae ynteu ymlad auory. ~

Yna y vorwyn a|gymerth galaath a|pheredur a|bỽrt ac a|dywaỽt

vrthunt. Arglỽydi heb hi chỽi a|glyỽssaỽch y gallaf|i iachau y wreic

racko os|mynnaf. ac am hynny beth a|gynghorỽch chỽi. Myn ỻaỽ

duỽ heb y galaath o rody di loneit y dysgyl racko o|th waet ti a vydy

varỽ. Myn|duỽ heb hitheu o|r bydaf|i varỽ yr iachau y wreic da. diolỽch

a|gaffaf inneu gan|duỽ ac anryded y gan y byt. a|gỽeỻ yttiỽ vy marỽ

i no ỻad yr vn ohonaỽch chỽi. neu lad ohonaỽch chỽitheu y gỽyr rac+

ko. kanys mi a|ỽn na aỻỽn ni diangk yn vyỽ drỽy vrỽydyr heb goỻi

ae chỽchỽi ae ỽynteu. ac am|hynny drỽy aỽch kennyat chỽi myui a

gỽplaaf udunt ỽy eu|hewyỻys. ac yna hi a|elwis ar y|rei pennaf a

welei o|r ty. ac a|dywaỽt ỽrthunt bydỽch lawen heb hi. kanys auory y

talaf yr hynn yd yỽch yn|y geissyaỽ. Pan glywssant ỽynteu hynny.

ỽynt a|ỽnaethant y|ỻewenyd mỽyaf. ac yna gỽedy kyfedach ac es+

mỽythdra.