LlGC Llsgr. Peniarth 18 – tudalen 23r
Brut y Tywysogion
23r
y gỽrthladỽyt ef y gan varedud ap bledyn y ewythyr.
ac yna y gellygỽyt. Jthel ap ridit. o garchar henri ure+
nhin. a phan doeth y geissaỽ ran o powys. ny chafas dim.
a|phan gigleu Ruffud ap kynan ry|ỽrthlad Meredud
ap Cadỽgaỽn o veredud ap bledyn y eỽythyr. anu+
on a|ỽnaeth catỽallaỽn ac yỽein y veibon a dirua+
ỽr lu gantunt hyt y meiryonyd a|dỽyn a|ỽnaeth+
ant holl dynyon y|wlat honno a|e holl da gyt ac
wynt hyt yn lleyn. ac odyna kynullaỽ llu a|ỽna+
ethant ac aruaethu alldudaỽ holl wlat poỽys a
heb allu kyflenỽi eu haruedyt yr ymhoelassant
drachefen. ac yna yd ymaruolles Meredud ap ble+
dyn a meibon cadỽgaỽn ap bledyn ygyt. ac y|di+
ffeithassant y ran vỽyhaf o gyuoeth llywarch ap
Trahayarn o aachaỽs* nerthu ohonaỽ veibon grufud
ap kynan ac ymaruoll ac wynt. Y ulỽydyn racỽy+
neb y lladaỽd Gruffud ap Meredud ap bledyn. Jth+
el ap Ridit ap bledyn y|gefenderỽ ygỽyd Meredud
y tat. ac yn ol chydic o amser wedy hynny y llad+
aỽd catwallaỽn vab Gruffud ap kynan y dri eỽyth+
yr. nyt amgen gronỽ. a|ridit. a|Meilir Meibon y+
wein ap etwin. kanys ygharat verch yỽein ap
etỽin. oed wreic Ruffud ap kynan. a honno oed
vam catỽallaỽn ac yỽein. a chatwaladyr a llaỽer
o uerchet. Yn|y ulỽydyn honno y magỽyt teru+
ysc y·rỽg Morgan a Meredud Meibon cadỽgaỽn
| « p 22v | p 23v » |