LlGC Llsgr. Peniarth 18 – tudalen 33v
Brut y Tywysogion
33v
yd yr hỽnn a|phurueidaỽd duỽ o|e agkymare+
dic degỽch ac a|e kyflaỽnaỽd o anhebygedic
bruder. ac a|e hadurnnaỽd o|leỽder a molyan+
rỽyd. Vfuyd a|hegar a|hael ỽrth y|tlodyonn.
huaỽdyr ỽrth yr ufydyon. garỽ ac ymladgar
ỽrth y|ỽrthỽynnebedigyon. ỽedy gỽneuthur
yachỽaỽl benyt. A chymryt kymun corff crist
ac oleỽ ac aghen. Ac ymeivot yn|y lle yd oed
y|ỽydua yn eglỽys tissilyaỽ sant y cladỽyt yn
enrydedus. ny bu uaỽr ỽedy hynny yny las llywelyn
ap madaỽc y|uab. y gỽr a|oed vnic o·obeith y holl
ỽyr pỽys. Ac yna y delis cadỽallaỽn ap madoc
ap idnerth einaỽn clut y vraỽt ac yd anuones
y gatỽryaeth ỽein gỽyned. Ac yỽein a|e
rodes yr ffreinc. a|thrỽy y|getymeithon a|e deu+
lu y|dieghis hyt nos o wickỽm ynn ryd.
TRugein mlyned a|chant a mil oed oet
crist pann uu varỽ agkarat gỽreic grufud
ap kynan. Yn|y vlỽydyn honno y|bu va+
rỽ meuryc escob banngor. Yn|y vlỽydyn honno
y goresgynnaỽd hoỽel ap Jeuaf o|dỽyll castell
dafalỽern yg|kyueilaỽc. Ac o achos hynny y|syr+
thaỽd oỽein gỽyned yg|kymeint o|dolur ac na a+
llei na|thegỽch teyrnnas na|didanỽch nep ryỽ
dim arall y arafhau na|e|dynnu o|e gymeredic lit.
Ac eissoes kyt kyrchei aniodeuegedic tristit
| « p 33r | p 34r » |