LlGC Llsgr. Peniarth 46 – tudalen 347
Brut y Brenhinoedd
347
edỽin gantaỽ o gaer ỽyragon y|ỽassana+
ethu y|urenhines. a gỽedy adnabot o
vreint hir y|chỽaer. galỽ a|oruc arnei
yn dieithyr e|hunan. a gỽedy adnabot o|r
uorỽyn y|braỽt. ouynhau a|ỽnaeth rac
y elynyon y adnabot. a|menegi a|oruc y
vorỽyn ansaỽd y|llys y|braỽt. a|dangos y
deỽin idaỽ a|dathoed yr aỽr honno allann
ỽrth rannu yr ychenogyon. a|phan ỽelas
breint y deỽin ymgyscmyscu a|oruc a|r y+
chenogyon lle yd oed y|deỽin yn reoli. a|ph+
ann gauas lle ac amser. gossot a|ỽnaeth
a|e vagyl hayarnn ydan uronn y|deỽin. ac
ar y|dyrnnaỽt hỽnnỽ y|lad. a bỽrỽ y|uagyl
o|e laỽ. ac ymgymyscu a|r|ychenogyon. ac
nyt adnabu neb arnaỽ ỽneuthur y|gyf ̷ ̷+
lauan. a chynhỽryf maỽr a|uu am lad y
deỽin. a|gossot gỽyr ar byrth y|dinas y|ge+
issaỽ y|neb a|ladassei y deỽin. a|cherdet a|or+
uc breint hir parth a|r dinas a|elỽit exon.
a|dyuynnu y|bryttannyeit o|bop le attaỽ
a|chadarnnhau y|dinas yn|y kylch. a|mene ̷+
gi udunt mal y|lladassei y|deỽin. ac anuon
| « p 346 | p 348 » |