LlB Llsgr. Ychwanegol 19,709 – tudalen 36r
Brut y Brenhinoedd
36r
rufein a|r teyrnas genthi mal y geỻit kynal yr ynys
yn gadarn ac yn dagnefedus rac ỻaỽ. ac ereiỻ a gyg+
horei idaỽ rodi y verch y vren·hin o|wlat araỻ a|digavn
o eur ac aryant genti. a rodi y kyfoeth oỻ gvedy yn+
teu y gynan meiradaỽc nei y eudaf. ac eissoes y kyg+
hores karadaỽc iarỻ kernyv y|r brenhin gỽalaỽd attaỽ
Maxen wledic a|rodi idaỽ y verch a|r kyfoeth gvedy ef
genti. ac o hynny y|tybygei ef kaffel tragywydaỽl
hedỽch. kanys mab oed vaxen y llywelyn ewythyr y
elen luydaỽc megys y dywespvyt vchot y vynet o|r
ynys hon gyt a chustenin vab elen. a mam vaxen
a hanoed o dylyedogyon rufein. ac yno y ganydoed
ynteu. ac ar|uyrder o vrenhinavl genedyl o vam
a|that yd hanoed. a chynhyru y ỻys yn vavr a|wnaeth
kynan meiradaỽc nei y brenhin o achaỽs rodi o|r
jarỻ y kygor hỽnnỽ y|r brenhin. kanys y vryt ef a|e
vedỽl oed ar y vrenhinyaeth. ac irỻavn yd edewis
y ỻys. ac yna eissoes. sef a|wnaeth karadaỽc iarỻ
kernyv anuon meuryc y vab hyt yn rufein y ve+
negi hyny y vaxen. Sef y kyfryỽ ỽr oed veuryc gỽas
maỽr tec teilỽg clotuaỽr o deỽred a haelder a|phy
beth bynac a dywettei ar y|tafaỽt. ef a|e kadarnha+
ei o|e weithret a|e arueu. a gvedy dyfot Meuryc rac
bron maxen. kymeredic vu ef ymlaen pavb yn
en·ryded. ac yn yr amser hvnnv teruysc mavr a
oed y·rỽg maxen a deu amheraỽdyr ereiỻ oed yno
gratian a valavnt y vrodyr e|hun. kanys y rei hyn+
ny a|r daroed vdunt gỽrthlad maxen o|r tryded ̷ ̷
| « p 35v | p 36v » |