LlB Llsgr. Cotton Cleopatra A XIV – tudalen 96r
Llyfr Cyfnerth
96r
Teir dirỽy brenhin ynt. dirỽy treis.
a dirỽy ledrat. A dirỽy ymlad kyfadef.
Diuỽyn dirỽy treis yỽ guyalen aryant
a fiol eur a chlaỽr eur yn| y mod y dywes+
pỽyt am eu messureu yn diuỽyn sarha ̷+
et brenhin. Diuỽyn dirỽy ymlad kyf ̷+
adef yỽ deudeg mu. Diuỽyn dirỽy let ̷+
rat yỽ kyssỽynaỽ lletrat ar dyn. A diwat
o·honaỽ yn da ar y tauaỽt a gossot reith
arnaỽ ae phallu. lleidyr kyfadef can pa+
llỽys y reith. guiryon oe pen e| hunan.
ny delit dim gantaỽ deudeg| mu dirỽy
arnaỽ. Tri anhebgor brenhin ynt. effe ̷+
irat teulu. Ae ygnat llys. ae teulu. Tri
pheth ny chyfran brenhin a neb. y eur ̷+
graỽn. ae hebaỽc. ae leidyr.
TRi petwar yssyd. petwar achaỽs
yd ymhoelir braỽt. O ofyn guyr
cadarn. A chas galon. A| charyat kyfeill+
on. A serch da. Eil petwar yssyd. pedeir
taryan a a rỽg dyn a| reith gulat rac haỽl
| « p 95v | p 96v » |