Llsgr. Caerdydd 3.242 (Hafod 16) – tudalen 95
Meddyginiaethau
95
dỽfyr oer. a|ro y|r claf y yfet. Rac trasychet; yfet y centori
drỽy dỽfyr haỽd dỽymyn. a hynny a|dyrr y sychet. ac a|bur ̷+
haa y dỽy·vronn a|r kyỻa. Rac y vrech; kymer. ludỽ y|gruc
a ỻudỽ gỽenyn. neu ysmaelas a ỻudỽ o gorn tarw a|mel
ac emenyn ac ir ef a hỽnnỽ. Rac tra chỽyt; kymer yr eruin
a berỽ drỽy laeth geifyr a|dyro idaỽ y yfet. a|hynny a|e|tyrr.
Rac|ỻosc tan neu|dỽfyr; dot deil y liliỽm. myỽn ỻaeth be+
rỽedic. a|gossot ar|y weli yny|vo iach. Rac ỻesteir pissaỽ;
kymer. emennyd ysgyuarnaỽc. a|tharaỽ hỽnnỽ ar|win
arogleuuaỽr. a ro y|r claf y yfet. Rac brath neidyr; dyro
y|myỽn oleỽ sud y fenigyl. neu yr auans. neu y rut. neu
y|wermot. ac yfet hỽnnỽ neu vỽytaet. Rac attal maessa;
dỽfyr a gỽreid|ysgaỻ man o|r koet. a|dyro y|dỽfyr hỽnnỽ idaỽ
y yfet. O|r genir pryfet myỽn dyn neu|lỽdyn; dot arnaỽ
wreid y|dragans. ac ef a|vyd marỽ y pryf yn|diannot.
Rac cryt; yfet sud y rut. a|ỻyngket tri gronyn o|r colian+
drỽm. ac yfet yr|apiỽm drỽy|dỽfyr. a|chynnuỻ y priantaen
dan dan* dywedut dy bader. ac yfet hỽnnỽ drỽy win a|phybyr.
Araỻ yỽ; kymer sud y ganwreid gỽedy briwer a sud y|wermot
a|chymysc ac oleỽ haỽddỽym ac ir dy gorf yn gỽbyl tridi+
eu ar vntu ac ef a|diffyd y cryt heb olud. O|r byd aghen
gryt kadarn ar|dyn par idaỽ yfet y|diot vry myỽn enne+
int. a|mogel rac kyhỽrd dim o|r|dỽfyr a|e vreicheu. a|chymer
eido y daear a berỽ ef yn|ffest a gossot yn vrỽt ar|y|benn a
goỻỽng waet y vreicheu ac ef a vyd iach drỽy nerth duỽ.
Rac chỽydu ac ucheneido; taraỽ dyrneit a|hanner o|r be+
toni ar dỽfyr mỽygyl a|dyro idaỽ y yfet. Y|dorri chỽyt; kymer.
| « p 94 | p 96 » |