Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 102r
Buchedd Dewi
102r
on meirỽ. Ac yn yng ar hynny nachaf y|clyỽynt llef
didan ac arogleu teccaf yn lleỽni y dinas. Sef a|oruc
dauid yr eilỽeith dyỽedut yn vchel. Arglỽyd iessu grist
heb ef kymer vy eneit. Ac na at vi y drigyaỽ a|uo hỽy
yn|y drygeu hynn. Ac yn ol hynny ỽynt a|glyỽynt eilỽ+
eith yr angel yn dyỽedut vrth deỽi. Dauyd sant ym+
parattoa. y|dyd kynntaf o vaỽrth ef a|daỽ dy arglỽyd
di iessu grist a naỽ rad nef ygyt ac ef a|decuet y|day+
ar y|th erbyn. Ac a el a eilỽ ygyt a|thi o|r rei a|vynnych
ti. o yscolheic. a|lleyc. gỽiryon. a|phechadur. Jeuang
a|hen. mab a|merch. Gỽr a|gỽreic. croessan. a|phutein.
Jdeỽ. a sarascin. a hynny a|daỽ ygyt a|thi. Ar brodyr
kymein hun. pann glyỽyssant hynny. drỽy ỽylyaỽ
a|chỽynaỽ. Ac vdaỽ ac vcheneidyaỽ a|dyrchauassant
eu llef ac a dyỽedassant. Arglỽyd deỽi sant canhor+
thỽya yn tristit. Ac yna y|dyỽat deỽi vrthunt hỽy
gann eu didanu a|e llaỽenhav. Vy mrodyr bydỽch ỽas+
tat ac vn vedỽl. A|pha|beth|bynnac a|ỽelsaỽch ac a|glyỽ+
yssaỽch gennyf|i. kedỽch ef a|gorffennỽch beth mỽy.
O|r dyd hỽnnỽ hyt yr ỽythuet nyt aeth deỽi o|r eglỽ+
ys o bregethu y baỽp a gỽediaỽ. Y chỽedyl eissoes yn
oet vn dyd a|aeth drỽy yr holl ynys honn ac Jỽerdon
gann yr angel. Sef val y|dyỽedei yr angel. gỽybyd+
ỽchỽi pann yỽ yn|yr ỽythnos nessaf yssyd yn|dyuot
yd a deỽi sant ych arglỽyd chỽi o|r byt hỽnn yma at
| « p 101v | p 102v » |