Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 103r
Buchedd Dewi
103r
yach yỽch heb·y deỽi. A|phoet grymus yỽch vot ar|y|day+
ar. A byth bellach nyt ymỽelỽn ni. Yna y|clyỽit gaỽr
gyffredin yn kyuodi gann gỽynnvan ac ỽylouein a
dagreu. Ac yn|dyỽedut. och na|lỽnck y|dayar|ni. och na
daỽ tan y an llosci ni. och na|daỽ y mor dros y|tir. och|na
syrth y|mynyded ar an gỽastat. ni. a|phaỽb|hayach a|o+
ed yna yn mynet y angheu. O|dyỽ sul hyt dyỽ merchyr
gỽedy marỽ deỽi. ny laỽssant na|bỽyt na|diaỽt. namyn
gỽediaỽ drỽy dristit. A nos vaỽrth yn kylch canu y kei+
laỽc. nachaf lu o engylyon yn lleỽni y|dinas. A|phob
ryỽ gerdeu a|digrifỽch ym|pob lle yn|y|dinas yn llaỽn.
Ac yn|yr aỽr vore nachaf yr arglỽyd iessu grist yn dyfot
a|chyt ac ef naỽ rad nef megys y gadaỽssei yn|y va*+
ỽrỽrhydri. Ar heul yn eglur yn egluraỽ yr holl luoed.
A|hynny dyỽ maỽrth y|dyd kynntaf o galan maỽrth
y kymerth iessu grist eneit deỽi sant ygyt a|maỽr
uudugolyaeth a|lleỽenyd. ac anryded. gỽedy y|neỽyn
a|e sychet. a|e anỽyt. a|e lauuryei. a|e dyrỽest. a|e gar+
dodeu. a|e vlinder. a|e drallaỽt. a|e brouedigaetheu.
a|e vedỽl am|y byt y kymerth yr engylyon y eneit. Ac
y|dugant yr lle y|mae goleuni heb diỽed. ar|gorffỽys
heb lauur. a lleỽenyd heb tristit. ac amled o bop ryỽ
da. a budugolyaeth. a chlaerder. a|thegỽch. y lle y
mae molyant rysỽyr crist. y lle yr ysgaelussir y ky+
uoethogyon drỽc. y lle y|mae yechyt heb dolur.
| « p 102v | p 103v » |