LlGC Llsgr. Llanstephan 27 (Llyfr Coch Talgarth) – tudalen 113r

a nichodemus a safyssant ar gyhoed gyt ac ef rac bronn pilatus

y eu|daly. A phaỽb o·honunt ˄a ymgudyaỽd namyn nichodemus e|hun

a ymdangosses udunt. kanys tywyssaỽc o|r Jdewon oed. a gouyn

udunt beth a vynnynt yna y heglỽys ỽy. Pa|delỽ y beidy di heb

ỽynteu dyuot y·gyt a nyni gỽedy kytsynnyaỽ a Jessu o·honat. a|e

ganmaỽl y|n|herbyn ni ỽrth y raclaỽ. ac ỽrth hynny byd gyf+

rannaỽc yr aỽrhonn yma ac rac ỻaỽ ac ef. amen bit ual|hynny

heb·y nichodemus hyt ym|penn teirgỽeith. ac ual hynny yd|ym+

dangosses Josep udunt. a gouyn udunt pa uar oed ganthunt

ỽy ỽrthaỽ ef yr erchi y pilatus corff iessu. ỻyma yn|y vynnw+

ent y gossodeis i efo. ac y troeis ỻenỻiein lan yn|y gylch. ac a

ossodes uaen. ar drỽs yr ogof. ny bu Jaỽn na da y gỽnaetha+

ỽch a|r gỽirion hỽnnỽ. ac na choffaassaỽch y genifer ỻes a|wna+

eth yroch. am hynny y crogassaỽch chỽitheu efo ac y gỽeliassaỽch

a|gleif. Pan|gigleu yr Jdewon hynny daly Joseph a|orugant. a|e

anuon yng|karchar o achaỽs y sadỽrn hỽnnỽ hyt yn vn o|r sa+

dyrneu ereiỻ. kannyt oed aỽr y wneuthur dim yn|y erbyn ka+

nys sadỽrn oed. ninneu a wdam heb ỽynt na dyly dy gorff di

y dodi yn|y daear. namyn y vỽrỽ y vỽystuileit ac y adar. Tebic

yỽ yr ymadraỽd hỽnnỽ heb·y Joseph y ymadraỽd goliath. yr|hỽnn

a wattwaraỽd duỽ byỽ ac a ysgaelussaỽd dauyd. Ac ỽrth hynny

y dywaỽt duỽ trỽy y proffỽyt. Mi bieu y dial. a mi a|e dialaf.

Ac ovynhau a|oruc pilatus o|e gaỻon. ac ymolchi. a|dywedut.

Yng|gỽyd yr heul glan|ỽyf|i heb ef o waet y gỽirion hỽnnỽ. a chỽ+

itheu a|gymerassaỽch arnaỽch. ac ar aỽch meibyon y waet ef.

Ac y|mae ovyn arnaf inneu dyuot bar|duỽ a|e dial arnaỽch chỽi

ac ar aỽch meibyon am·danaỽ ynteu megys y dywedassaỽch. ~