LlGC Llsgr. Llanstephan 27 (Llyfr Coch Talgarth) – tudalen 45r
Pa ddelw y dylai dyn gredu i Dduw
45r
hỽnnỽ heuyt yd eirch duỽ y dyn na wnel argywed ar gorff
dyn araỻ o|e daraỽ neu o|e|doluryaỽ neu o|e garcharu. Ac yn|y
geir hỽnnỽ yd eirch duỽ y dyn na|dycko ymborth na|da dy+
nyon tlodyon. sef yỽ hynny trỽy dỽyỻ neu gamwed. ac na
atter dynyon tlodyon y uarỽ o newyn ac o eisseu. ac na chat+
two dyn lit o|digassed ganthaỽ ỽrth y gymodaỽc. Chwechet
geir. dedyf. yỽ. Na|wna odineb. Duỽ a|eirch yn|y geir hỽnnỽ na|bo
kyt·knaỽt y·rỽng gỽr a|gỽreic odieithyr priodas. kanys kyn+
taf crefyd a|oruc mab duỽ vu briodas. a|chynt uu y crefyd hỽn+
nỽ noc offeiryat. Seith·uet. geir. dedyf. yỽ. Na|dỽc cam·dystolyaeth
Duỽ a|eirch yn|y geir hỽnnỽ na|chadarnhao dyn gelwyd drỽy
dỽng. neu trỽy y koỻetto y gymodaỽc o|e|da pressennaỽl neu
o|e|glot. Wythuet geir. dedyf. yỽ. Na wna ledrat. Yn|y geir hỽnnỽ yd
eirch duỽ y dyn na dycko da y gymodaỽc o|e anuod nac y dreis.
nac heb wybot idaỽ. nac o|e gymeỻ. nac o|e dỽyỻ. nac o|e ockyr.
Naỽ·uet. geir. dedyf. yỽ. na chwennycha na thir na thy dy gymoda+
ỽc. Sef yỽ hynny trỽy dwyỻ neu gamwed. Decuet. geir. dedyf. yỽ.
Na|chwennycha wreic dy gymodaỽc. na|e was na|e uorwyn na|e
aniueil. Sef yỽ hynny. na chỽennycha|da kychỽynnaỽl dy
gymodaỽc trỽy dỽyỻ neu trỽy gamwed. ~ ~ ~ ~ ~ ~
G ỽedy kattwo dyn y|dengeir dedyf. reit yỽ idaỽ ymgadỽ
rac gỽneuthur neu gytsynnyaỽ yn vn o|r seith bechaỽt
marỽaỽl. a|chyntaf pechaỽt o·honunt yỽ. syberwyt. ymry+
vygu o dyn yn|y gnaỽt. a|cheissyaỽ ymdyrchafel yn vch noc
y|dylyho. neu ymgyfartalu ac uch noc ef. neu dremygu y
gystaldyn neu a|vei is noc ef. a cheingeu y pechaỽt hỽnnỽ
ynt. An·uvuỻtaỽt. gỽarthau dyn neu y dremygu. gỽneuthur
| « p 44v | p 45v » |