LlGC Llsgr. 3035 (Mostyn 116) – tudalen 103v
Brut y Brenhinoedd
103v
Ac ỽrth hynẏ kylch y| fynaỽn a| wnaethant yr yscymun vrat+
wyr yn ỻaỽn o| r gỽenỽyn. hyt pan lygrỽys y| dỽfỽr a| rettei
o| r fynyaỽn Ac ỽrth hyny val y ỻewas y brenhin y dỽfỽr
hỽnỽ. Y| e| bryssedic agheu y darystygaỽd A chẏt ac ynteu ỻa+
wer o| dynyon ereiỻ a lewas y dỽfẏr a vuant veirỽ A| gỽe+
dy kaffel gỽybot y| tỽyỻ hỽnnỽ. ỻanỽ y| fynaỽn o| r dayar
hyt pan yttoed cruc maỽr yn vch no| r dayar arnei. A| gỽe+
dy honi marwolaeth y brenhin drỽy y| teyrnas ymgynuỻ+
aỽ a| wnaethant yr archescyb ac escyb a| r abadeu a| r| yscol+
heigon. Ac ỽynt a| dugassant y| gorff ef hyt y|manachaỽc*
ambẏr Ac y|myỽn kor y| keỽri gyr ỻaỽ emrys wledic y
vraỽt yn vrenhinyaỽl arỽylant y| cladysant ~ ~
A ỽedy marỽ vthyr pendragon yd ymgynuỻassant
hoỻ wyrda ynys prydein. Jarỻ a barỽnyeit a| march+
ogyon vrdaỽ* ac escyb ac abadeu Ac athrawon hyt
yg| kaer vudei Ac o| gytsynyedigaeth paỽb yd
archyssant y dyfric archescob kaer llion ar ỽysc vrdaỽ
arthur y vab ynteu yn vrenhin Ac eu hagen ac eu kym+
heỻei y hyny. kanys pan gigleu y| saysson marỽolyaeth
vthyr pendragon yd eỻygyssynt ỽynteu gennadeu hyt
germani y geissaỽ porth. Ac neur dothoed ỻyges vaỽr
attunt a cholgrim yn| tywyssaỽc arnadunt Ac neur da+
roed vdunt gỽerescyn o humyr hyt y|mor katnneis yn| y
gogled. sef oed hynẏ y| tryded ran y ynys prydein A gỽedy
gỽelet o dyfric archescob. drueni y| bobẏl a| e hymdifedi. ef
a gymerth escyb ygyt ac ef Ac a dodes coron y| teyrnas
am y| ben arthur A| phymeheg* mlỽyd oed arthur yna.
Ac ny| chlyỽssit ar| neb araỻ eiroet y defodeu o deỽred a| hael+
der a oed arnaỽ ef. idaỽ ef hefyt yd eniỻeyssei y| dayoni
anyanaỽl a oed arnaỽ y veint rat hono hyt pan oed ga+
| « p 103r | p 104r » |