LlGC Llsgr. 3035 (Mostyn 116) – tudalen 148r
Brut y Tywysogion
148r
y deuth magnus vab herald vrenhin germania y loeger ac y|dif+
feithaỽd vrenhinaetheu y|saesson a gruffud vrenhin y|brytanyeit
yn dywyssaỽc ac yn ganhorthỽy idaỽ. ac yna y bu varỽ ywein
ap gruffud Trugein mlyned a|mil oed. oet. crist. pan dygỽydaỽd gruffud
ap. ỻywelyn. pen a|tharyan ac amdiffynỽr y brytanyeit drỽy dỽyỻ y
wyr e|hun. y gỽr a vu·assei anorchyfegedic kyn|no hẏnẏ yr aỽr hon
a|edewit y|myỽn glyneu diffeithon wedy diruaỽron anreitheu
a|diuessuredigyon vudygolaetheu ac aneiryf oludoet eur ac ar+
yant a gemeu a|phorforolyon wisgoed. ac yna y|bu varỽ josef
escob myniỽ. ac y bu varỽ dỽnchach vab brian yn mynet y|rufein
ac yna y|medylyaỽd herald vrenhin denmarc darestỽg y saesson
yr|hỽn a gymerth herald araỻ vab gotỽin. Jarỻ a|oed vrenhin
yna yn ỻoegyr yn dirybud diaryf ac o deissyuyt ymlad drỽy
wladaỽl dỽyỻ a|e drewis y|r ỻaỽr ẏnẏ vu varỽ. a|r herald hỽnỽ
a|vuassei jarỻ yn gyntaf a gỽedy hyny trỽy greulonder gỽedy
marỽ edwart vrenhin a|enniỻaỽd yn andylyedus uchelder teyrnas
ỻoeger. a|hỽnỽ a|yspeilỽyt o|e teyrnas a|e wywyt y gan wilim
bastard tywyssaỽc normandi. kyt bocssachei o|r vudugolyaeth
kyn|no hyny a|r gỽilim hỽnỽ drỽy diruaỽr vrỽydyr a|ymdiffyn+
aỽd teyrnas loeger o anorchyfegedic laỽ a|e vonhedicca lu. ac
yna y bu weith mechein rỽg bledyn a|ruaỻaỽn veibon kynuẏn
a maredud ac jthel veibon gruffud. ac yna y|dygỽydaỽd mei+
bon gruffud jthel a|ỻas yn|y vrỽydyr a meredud a vu varỽ o
| « p 147v | p 148v » |