LlGC Llsgr. Peniarth 11 – tudalen 137v

tu a|r llys. A phan|doeth ef y|r bont. neur daroed dyrchafel y

pynt a|chaeu y pyrth. a marius o|r|tu myỽn yn|dywedut. Gỽ+

alchmei y coỻet hỽnn a|doeth ymi o|th blegyt ti. ac o|r bydaf|vyỽ

i mi a|wnaf vot yn ediuar ytt. Ny bu wiỽ gan walchmei hir

dadleu ac ef. namyn ymchoelut dra|e|gevyn a|oruc pan weles

na aỻaỽd mynet y myỽn. a|dyuot hyt y ỻe yd oed y wreic yn

uarỽ a|e chymryt yn arafaf ac y gaỻaỽd a|e roi ar y varch a

dyuot a|hi hyt y|myỽn capel. a disgynnu y korff a|wnaeth ef

a|e ossot ar y ỻaỽr yn araf. ac ynteu yn|doluryus ac yn llida+

ỽc ỽrth hynny. ac odyna caeu y capel a|oruc ef rac dyuot bỽ+

ystuilot o|r fforest. a medylyaỽ y deuit o|e hamdoi ac o|e chywe+

iryaỽ gỽedy y delei ef ymeith ~  ~ ~  

A r hynny gỽalchmei a|aeth ymeith yn|drist ac yn|vedyl+

gar. kanys ny chyfauvassei* ac ef eiryoet dim kyndrỽc

ganthaỽ ac am y wreicda. a|ladyssit o|e achaỽs efo. Ac yna march+

ogaeth a|oruc ef drỽy y fforest. ac ual y byd ueỻy ef a|welei yn

dyuot ar hyt y fford tu ac attaỽ marchaỽc. ac aruer ryued

ganthaỽ ỽrth uarchogaeth. kanys y wyneb a|oed ar bedrein y

varch. a|e arueu gỽedy eu trỽssyaỽ yn trỽssa ar y gevyn. Ac yn+

teu pan weles ef walchmei yn dyuot gỽe˄idiaỽ a|oruc. a dywedut

Oi a varchaỽc bonhedic yr hỽnn yssyd yn|dyuot y|m herbyn.

yr duỽ yr archaf ytt na wnelych ym chweith drỽc. kanys myui

a|elwir y marchaỽc cachyat. Myn vyng|cret heb·y gỽalchmei nyt

ỽyt tebic y ỽr y dylyit gỽneuthur dim o gam idaỽ. a|phany bei

y medylyeu a|oed myỽn gỽalchmei o|r|blaen ef a|chwardassei law+

er am y arwydon. a|gỽalchmei a|dywaỽt ỽrthaỽ. a vnbenn heb ef