LlGC Llsgr. Peniarth 11 – tudalen 192v

laỽnslot. Ac am hynny drỽc uu ganthaỽ na wybu pa|un|oed.

Myn vym|penn i heb·y gỽalchmei ys gỽaeth vu gan y mar+

chaỽc nas adnabu. kanys nyt oed yn|y byt wr hoffach gan  ̷+

thaỽ noc ef. Arglỽyd heb y marchaỽc ef a|welir y|myui mae

tydi yỽ ef. Gỽir a|dywedy|di heb·y gỽalchmei. myui a|vum yno

a digrif yỽ gennyf vyn taraỽ o varchaỽc kystal ac oed ef. a|thrist

vu gennyf wedy hynny am nas|adnabuum. a|dywet ym arglỽyd

pa|le y kaffỽyf ef. Nyt peỻ iaỽn efo heb ef o|r fforest honn. ka+

nys nyt oes yn|y byt le garedigach ganthaỽ no|r fforest honn

yma. A|r daryan a|duc ef o|lys arthur y|mae yma hi yn|y cap+

pel racko. ac yna ef a|e dangosses y walchmei. Arglỽyd heb y

marchaỽc araỻ ae gỽalchmei ỽyt ti. veỻy y|m gelwir i heb

ynteu. Je arglỽyd heb ef ỻawer dyd yr pan orffowysseis o|th

geissyaỽ di. kanys meliot o|loedygyr a ladaỽd nabigaỽns

o|r greic y tat. ac yn erchi y|titheu yr duỽ dyuot yn nerth idaỽ

megys y dyly arglỽyd da nerthau y|wr. Myn vyng|cret heb+

y gỽalchmei mi a|wnn y dyly meliot gael vy nerth|i yn

diffaelyedi. dan na bei yn wr ym o achaỽs y vam a|diodef  ̷+

aỽd y hangeu yn wirion o|m achaỽs i. a|dywet y gennyf

idaỽ y deuaf o|e nerthaỽ yn gyntaf|ac y gaỻỽyf wneuthur

neges araỻ yssyd arnaf y gỽneuthur ual na aỻaf y ga  ̷+

daỽ yn an·orffen. Y nos honno y bu ef yno hyt trannoeth

pan daruu offeren. a gỽedy offeren y marchaỽc a|aeth y+

meith. a gỽalchmei a|drigyaỽd yno y ymdidan a|r meu+

dwy. ac megys yr oed yn ymgyweiryaỽ odyno ef a|edrycha+

ỽd o|e vraen* tu a|r|fforest. Ac ef a|arganuv varchaỽc urda+

ỽl ar gevyn march maỽr uchel yn marchogaeth yn araf.