LlGC Llsgr. Peniarth 18 – tudalen 64r
Brut y Tywysogion
64r
A|menegi hynny a|ỽnaethant y synyscal a|chcỽn*+
ystal yr arglỽyd lyỽelyn. a|bryssyaỽ a oruc y|rei hyn+
ny yno y losci y castell. A|phann gigleu y|dyỽede+
dic rosser hynny dyuot a|oruc a|diruaỽr geder+
nyt ygyt ac ef yn borth idaỽ hyt yn lle y|dyỽede+
dic castell. A|phebyllaỽ o|vyỽn y muroed ychydic
o|dydyeu. A phann ỽybu lyỽelyn hynny kynnu+
llaỽ llu a|oruc a|dyuot hyt ym maelenyd. A|ch*+
rymryt gỽrogaeth gỽyr maelenyd. A gỽedy
ennill deu castell ereill rodi kennat a|ỽnaeth
y rosser mortmer y|ymhoelut dracheuen. Ac
yntev trỽy arch gỽyr brecheinnaỽc a|aeth y
vrecheinaỽc. A gỽedy kymryt gỽrogaeth y
ỽlat yd ymhoelaỽd y|ỽyned. Y ulỽydyn racỽy+
neb y kyrchaỽd Jon ystrans ieuanc a|oed vaeli
yna yg|kastell baltỽin. gyrch nos a|diruaỽr lu
gantaỽ ar traỽs keri hyt yg|kedeỽein. A|gỽe+
dy kynnullaỽ diruaỽr anreith ohonaỽ ymho+
elut a|oruc dracheuen yỽaert*. A phann gigleu
y kymry hynny y|hymlit a|ỽnaethant a|llad
y|dyd hỽnnỽ o|r sasson* mỽy no deu cant rỽg ar y
meyssyd. Ac yn yscubaỽr aber mihỽl. Ac yn|y
lle ỽedy hynny y|llosges ion ystrans yr yscu+
baỽr o achos y lladua honno. Ac ychydic ỽedy
hynny y llas y kymry yn emyl colunỽy. yr am+
sser hỽnnỽ yd oed edỽard yn ymdeith ar dal
| « p 63v | p 64v » |