LlGC Llsgr. Peniarth 190 – tudalen 201
Ymborth yr Enaid
201
ryeit. A|r|dagreu hynny a|elwit gỽlith yr
yspryt glan. y rei hynny a|dygỽydynt y
myỽn kaỻonneu y penytdynyon a|wnel+
ynt eu penyt yn deilỽng. a|diogel vydei
yno ry|gaffel rat y gan yr yspryt glan
a|e gỽbyl anỽylserch garyat. ac y·rỽng
y|deu rudeỻyon lygeit yd|oed yn kyrchu
byrgrỽnn destluslỽys eneu a|thrỽyn kyf ̷+
laddrum unyaỽnỻun ffroeneu egoret.
ac yn gỽanegu serchaỽl·vryt garyat o
arafber gyffro y|dwyỽolyon ffroeneu. ac
yngkylch y|nefaỽl drỽyn hỽnnỽ yd oed
deu glaerỽynnyon ganheitbryt wyneb
kyngrynyon. a rychwant amyl y|r gỽr
mỽyaf yn eu hyt ac araỻ yn eu ỻet.
A|r|gỽynvydic wyneb hỽnnỽ a|oed kyn
decket a|chyn egluret. ac na eỻit kyffe+
lybu idaỽ neb·ryỽ greadur corfforaỽl
na nefaỽl na daearaỽl. Megys gỽyn eiry
ystỽyỻ. neu wyn|vlodeu rosys. neu|lilys
neu avaỻ vlaỽt. neu|waỽn gorvynyd
| « p 200 | p 202 » |