LlGC Llsgr. Peniarth 32 (Y Llyfr Teg) – tudalen 155
Llyfr Iorwerth
155
danaỽ hyt ỽyl san|fret. ac o hynny aỻan diuỽ+
yn y ỻỽgyr. Y gỽanhỽynar hyt galan·mei;
aryant tal. O galan·mei aỻan; diuỽyn y ỻỽ+
gyr. Ym·pob amser y oỻỽng ysgrybyl aỻan o
garchar ny dylyir namyn aryant tal. Sef
ual y dylyir talu aryant; keinhaỽc o|r march
a dimei o|r eidon. Ebol neu eboles o|r pedwaryd
dyd ar dec aỻan gỽedy ganer. keinhaỽc ym+
danaỽ. Lloi o|r pan anher hyt galan gaeaf
eu gỽarchae o|r pryt y gilyd. O|r ỽyn a|r myn+
neu tra vỽynt yn|dynu; y dadyl gyffelyb.
neu eu kymyscu ac eu mameu. Sef hyt y
dylyant dynu; hyt galan·mei. ac o hynny
aỻan vn vreint ac eu mameu. Moch a de+
ueit. a|geifyr. a gỽydeu. a Jeir. eil dewis o+
honunt a|dylyir. Perchyỻ bychein o|r pan
ymchoelont bisweil ac eu trỽyneu; vn kyfreith. a|e
mam a|r yt vydant. Yn|y kyfreith y bu hỽch o|r
moch. neu o|r man ysgrybyl a|dywedassam
ni uchot. kyn·ny bei namyn tri ỻydyn. vn
onadunt. Sef achaỽs oed; moch a|aei y|r neb
piewydynt. a hỽch a drigyei y berchennaỽc
yr yt. ny eỻit dỽyn hỽch o deu lỽdyn. kannyt
aei voch y|r perchennaỽc o|r trikyei y neiỻ.
Odyna y symudỽyt o|r pymthec ỻỽdyn o|r
moch; vn. ac o|r dec ar|hugeint o|r deueit; dauat.
| « p 154 | p 156 » |