Llsgr. Caerdydd 1.363 (Hafod 2) – tudalen 135r
Brut y Brenhinoedd
135r
llỽesteỽ eỽ gelynyon. ac en ỽn dyhewyt ac|o
ỽn ỽryt eỽ kyrchỽ. ac gwedy eỽ dyỽot hyt
en agos yr llỽesteỽ e gwylwyr a wybỽant eỽ
bot en dyỽot. ac|o seyn eỽ kyrnn e dyhỽnassa+
nt eỽ kytymdeythyon kyscyadỽr. Ac wrth
henny en kynhyrỽedyc dyhỽnaỽ a gwnaeth+
ant. ar rey o·nadỽnt kan ỽrys a wyskynt eỽ h+
arỽeỽ. ereyll en achỽbedyc o ofyn a ffoynt en
e lle y harwedey e tyghetỽen wynt. Ar br+
ytanyeyt hagen kan tewhaỽ eỽ bydynoed
en kyflym ac en wychyr e kyrchynt llỽ+
esteỽ a phebyllyeỽ eỽ gelynyon. ac y gyt a n+
oethynt cledyfỽeỽ eỽ rỽthraỽ e gelynyon.
Ar rey gwedy eỽ damkylchynỽ en dysseỽyt
nyt oed grynno e telynt ymlad. kanys er rey
ereyll gleỽder y gyt a|chyghor oed kanthỽnt.
Ac wrth henny e brytanyeyt en wychyr a
kerdynt y gyt ac eỽ llad e paganyeyt hyt
ar ỽylyoed. Ac o|r dywed e delyt octta ac
offa ar ssaysson en hollaỽl a waskarassant
hep em·kanlyn nep a|y kylyd.
AC gwedy e bỽdỽgolyaeth honno ed aeth
e brenyn hyt eg kaer alclỽt a llwny+
| « p 134v | p 135v » |