Llsgr. Caerdydd 3.242 (Hafod 16) – tudalen 44
Llythyr Aristotlys at Alecsander: Rheolau Iechyd
44
Heuyt ỻygredic ynt y kyrff gan dragỽres yr heul yr
honn yn sychu yr anyan. ac yn enwedic corfforoed yr
aniueileit yd ymborthir arnunt. Pan vo y korff yn
wressaỽc; bỽydeu kedyrn a berthynant idaỽ. kanys ha+
ỽd vyd idaỽ yna eu treulaỽ. Pan vo y korff yn vreisc
ac yn sych y anyan. bỽydeu bonhedic a|berthynant idaỽ
a bỽydeu ir kanys y rei hynny a|dreula ef yn haỽd.
Y|mod hyspyssaf y|dichaỽn dyn gynnal y iechyt yỽ; ar+
uer o|r bỽydeu a|r|diodyd a|vont gymhedraỽl y|ỽ anyan.
Hynn a brouet; o|r byd dyn a chorff gỽressaỽc y anyan
idaỽ; bỽydeu gỽressaỽc a berthynant idaỽ. O|r byd korff
oeruelaỽc idaỽ ynteu; bỽydeu oeruelaỽc a|berthynant
idaỽ. Heuyt y gorff gỽlyboraỽc neu y gorff sych y any+
an bỽydeu oeruelaỽc a waherdir. Kyỻa gỽressaỽc;
bỽydeu kedyrn a|vyd goreu idaỽ. kanys y kyffelyb
gyỻa hỽnnỽ a gyffelybir y dan a|losco ysgyryon sych+
yon breiscon. Kyỻa oeruelaỽc bỽydeu gỽann a vyd go+
reu idaỽ. kanys hỽnnỽ a gyffelybir y|dan yn ỻosgi gỽ+
eỻt. Arỽydon kyỻa iach ynt; bot y korff yn esgut.
a bot yn eglur y deaỻ. a mynych chỽennychu bỽyt. Arỽ+
ydon kyỻa afiachus ynt; trymder korff. an·orbeitrỽyd
ymwasgu ac ef. diogi yn|y|weithredoed. hỽyd yn|y wyneb
dileu gen yn vynych. golỽc ymatlaes. brytheiraỽ yn
vynych. a phan glywer hynny yn chỽerỽ. kanys hynny
a|vac gỽynnoed yn|y kyỻa y rei a dardant drỽy y korff
a|r aelodeu ac a barant gassau bỽyt. Yn|y mod hỽnn
y dangossir y|dyn gadỽ y gorff yn iach. Pan gyuotych
| « p 43 | p 45 » |