LlB Llsgr. Harley 958 – tudalen 28r
Llyfr Blegywryd
28r
nac ẏm|peỻ nac ẏn agos ẏ bei. os ẏn agos.
ẏ rẏghẏỻ a dẏlẏei ẏ alỽ megẏs ẏ clẏỽhei
ẏ varn a rodit arnaỽ. Os ẏm|peỻ ẏ bei ẏ|ar+
hos a dẏlẏit. hẏt pan ẏmdangossei ẏ mẏỽn
ỻẏs. o|r geỻit ẏ gaffel ỽrth gẏffreith ẏn am+
seraỽl. Eil ẏỽ braỽt a|rother ar dẏn kẏtrẏch+
aỽl trỽẏ ỽrthrẏmder o pleit ẏ brenhin neu
ẏ braỽdỽr. neỽ wẏr ẏ ỻẏs. Trẏdẏd ẏỽ barn
braỽdỽr anheilỽg. Tri dẏn ẏssẏd. nẏ dich+
aỽn vn o·honunt bot ẏn vraỽtỽr teilỽg
trỽẏ gẏfreith. vn ẏỽ dẏn anafus. megẏs
bẏdar neu daỻ. neu glafỽr. neỽ dẏn gorf+
fỽẏỻaỽc. dẏn a orffo ẏ rỽẏmaỽ vn weith
am ẏ ẏnuẏtrỽẏd. neỽ dẏn nẏ aỻo dẏwedut
ẏn iaỽn megẏs crẏc anẏanaỽl. Eil ẏỽ dẏn
eglỽẏssic rỽẏmedic ỽrth urdeu kẏssegredic
neu ỽrth greuẏd. Trẏdẏd ẏỽ ỻeẏc heb aỻu
trỽẏ gẏfreith idaỽ ẏ varnu o vreint tir. neu
o vreint sỽẏd. Teir fford ẏ geỻir gỽrthot bra+
ỽtỽr teilỽg. vn ẏỽ o|e vot ẏn aghẏffredin ẏ+
n|ẏ dadẏl ẏ·rỽg ẏ kẏnhenusson ẏn|ẏ ỻẏs kẏn
barn. Eil ẏỽ ẏ vot ẏn gẏfrannaỽc ar ẏr hẏn
ẏ bo ẏ dadẏl o·honaỽ pei geỻit ẏ enniỻ trỽẏ
varn. Trẏdẏd ẏỽ kẏmrẏt gobẏr am ẏ da+
dẏl ar nẏ bo gossodedic ẏ vraỽtỽr ẏ mẏỽn
kẏfreith. Nẏ eỻir kẏmheỻ dẏn eglỽẏs+
| « p 27v | p 28v » |