LlB Llsgr. Harley 958 – tudalen 53r
Llyfr Blegywryd
53r
dỽ kẏfreith o|r moch. deudec ỻẏdẏn a|baed.
O|r kadỽ kẏfreith o|r deueit. dauat a geffir
ohonunt. A|ffẏrỻig o pob pum llydẏn hyt
ẏ kadỽ kẏfreith. Meint ẏ kadỽ kẏfreith o|r de+
ueit. dec ỻẏdẏn ar|hugeint a hỽrd. O pob
oen ẏ telir. ỽẏ iar hẏt ẏ kadỽ kẏfreith. Ac
ẏna oen a telir ohonunt. O|r geiuẏr a|r mẏn+
neu ẏ dadẏl gẏffelẏp. Y neb a gaffo gỽẏdeu
ẏn|ẏ ẏt. torret ffon kẏhẏt ac o pen ẏ elin hẏt
ẏm|pen ẏ vẏs bẏchan. ẏn|ẏ brasset ẏ mẏnho.
a ỻadet ẏ gỽẏdeu ẏn ẏr ẏt a|r ffon. Ac a ỻatho
ẏ maes o|r ẏt talet. Gỽẏdeu a|gaffer ẏn
ỻẏgru ẏt trỽẏ ẏscubaur. neu trỽẏ ẏtlan; gỽas+
cer wialen ar eu mẏnẏgleu a|gatter ẏno ẏ+
nẏ uỽẏnt ueirỽ. Y neb ẏ gaffo iar ẏn|y ard
neu ẏn|ẏ ẏscubaỽr. dalẏet iar ẏn diỻẏgho
ẏ perchen hi o ỽẏ. Neu o|r deilẏ ẏ keilaỽc. tor+
ret ewin idau. a|goỻẏghet ef ẏn rẏd. neu gy+
meret ỽẏ o pob iar oc a uo ẏn|ẏ tẏ. Y neb a
gaffo kath ẏn ỻẏgotta ẏn|ẏ ard lin. talet
ẏ perchennaỽc ẏ llỽgẏr. Y neb a gaffo ỻoi ẏ+
n|ẏ ẏt; dalyet ỽẏnt o|r prẏt pỽẏ gilẏd heb la+
eth eu mameu. Ac ẏna goỻẏghet ẏn rẏd. O|r
ỻẏgrẏr ẏt ẏ neb dẏn ẏn emẏl tref·gord. ac na
chaffo ẏ perchennaỽc dalẏ vn ỻỽdẏn arnaỽ
| « p 52v | p 53v » |