LlGC Llsgr. 3035 (Mostyn 116) – tudalen 200r
Brut y Tywysogion
200r
ac yn|y ỻe a|elwir kori y|pebyỻaỽd. ac o|r tu araỻ y|r coet yd
ymgynuỻaỽd y kymry y·gyt a ỻywelyn ap joruerth y|tywyssaỽc y
ỽrthỽynebu y|r brenhin. ac yna kyrchu y|gelẏnẏon a|wnaeth+
ant ac ymlad yn duruig ac ỽynt a|gỽneuthur diruaỽr
aerua arnunt ac ẏno ẏ|delit gỽilim breỽẏs Jeuanc yn vrath+
edic. ac y carcharỽẏt a|thros y|eỻygdaỽt ef y rodet. y ỻywelyn
ap joruerth gasteỻ bueỻt a|r wlat a|diruaỽr sump o arẏant. ac yna
yd|ymchoelaỽd y brenhin y loegẏr yn gewilidyus eithẏr cael
gỽrogaeth o hona* y gan y|tywyssogyon a oedynt yno a|furuaỽd
tagned y·rygtaỽ a ỻẏwlẏn ap joruerth. Y|vlỽẏdẏn rac·ỽyneb y|bu
varỽ joruerth escob myniỽ ~ ~
D eg|mlyned ar|hugein a deucant a mil oed oet crist pan
vordỽyaỽd henri vrenhin a diruaỽr lu aruaỽc ygyt ac
ef y|freinc ar vedyr eniỻ y|dylyet o|normandi ac angiỽ a|phei+
taỽ ac yn|ebrỽyd wed* hyny o achaỽs tẏmestẏl a|marỽolaeth
drỽy y dỽyỻaỽ o|e arnaeth* yd ymhoelaỽd y loeger. Y|vlỽẏ+
dyn hono y bu varỽ gỽilim camtỽn o gemeis. ac yna y bu
varỽ. ỻywelyn. ap maelgỽn Jeuanc ẏ gẏuoeth y gỽyned ac y|cladỽẏt
yn anrydedus yn aber conỽẏ. Y|vlỽydẏn hono y|croget gỽi+
lim breỽẏs jeuanc. y gan. ỻywelyn. ap joruerth wedẏ y dala yn ystaueỻ
y|tywyssaỽc gyt a|merch jeuan vrenhin gỽreic y|tywyssaỽc. Y|vlỽy+
dyn rac·ỽyneb y|bu varỽ maelgỽn ap rys yn ỻanerchaeron
ac y cladỽyt yn|y cabidyldy yn ystrat flur. Y|vlỽydẏn hono
yd|adeilaỽd henri vrenhin gasteỻ paen yn eluael odyna o
achaỽs teruysgeu a vagyssit y·rỽg. ỻywelyn. ap joruerth a|r brenhin
y ỻosges. ỻywelyn. dref y|casteỻ baldwin a|maes hyueid a|r geỻi
ac aber hodni ac a|distrywaỽd y cestyỻ hyt y|ỻaỽr o·dẏna
y tynaỽd y|went ac y|gỽnaeth gaer ỻion yn ỻudỽy kyt
| « p 199v | p 200v » |