LlGC Llsgr. 3035 (Mostyn 116) – tudalen 202v
Brut y Tywysogion
202v
henri vrenhin o vỽrdeỽs ac y kywarsagỽyt y kẏmrẏ a|ỻawer
o|r rei ereiỻ ygh* |aghyfreithaỽl. Y vlỽydẏn rac·ỽyneb y bu varw
rys mechyỻ ap rẏs gryc. Y vlỽẏdẏn hono y keissaỽd gruffud
ap. ỻywelyn. dianc o garchar y brenhin yn ỻundein wedy bỽrỽ raff
drỽy fenestyr y|tỽr aỻan a|disgynu ar hyt y|raff a|thorri y|raff
a|e syrthaỽ ynteu yny dorres y vynỽgyl. ac yna y ỻityaỽd. dauid
ap. ỻywelyn. a dyuynu y|hoỻ wyrda ygyt a|ruthraỽ y elynyon o|e hoỻ
deruyneu eithyr a|oedynt y|myỽn cestyỻ ac anuon kenadeu
a|ỻythyreu a|wnaeth y dyuynu attaỽ hoỻ dywyssogyon kẏmrẏ.
a|phaỽb a gyfunaỽd ac ef eithyr gruffud ap Madaỽc a gruffud
ap gỽenỽynỽn a morgan ap hỽel a ỻawer o goỻedeu a|wnaeth
ef y|r rei hẏnẏ a chymeỻ o|e han·uod y|darestỽg idaỽ. Y vlỽydyn
honno y bu varỽ. Maredud ap rotpert penkyghorỽr kymrẏ
wedy kymrẏt abit creuyd yn ystrat flur Y|vlỽydyn rac·ỽẏ+
neb y kynuỻaỽd henri vrenhin gedernit ỻoegẏr ac jwerdon
ar vedyr darestỽg hoỻ gymry idaỽ ac y doeth hyt yn dyganỽy
a gỽedy kadernhau y casteỻ ac adaỽ marchogyon yndaỽ yd
ymhoelaỽd y loegẏr gan adaỽ aneiryf o|lu yn galaned heb
y cladu wedy ỻad rei a bodi ereiỻ. Y|vlỽydẏn rac·ỽyneb y
bu varỽ. dauid. ap. ỻywelyn. yn aber. vis maỽrth ac y cladỽyt gyt a|e
dat yn aber conỽy. a gỽedy nat oed etiued o gorff idaỽ y
gỽledychaỽd ywein goch a ỻywelyn y|nyeint veibon gruffud.
ap|ỻywelyn. y vraỽt yn|y ol. y|rei hyny o gygor gỽyrda a|ranassant
y|kyuoeth y·rygtunt yn deu haner. Y vlỽydẏn hono yd an+
uones henri vrenhin nicolas dymulus a|maredud ap rys
a maredud ap rys ywein y|digyuoethi mael·gỽn vychan. ac
yna y goruu ar vaelgỽn a|e eidaỽ fo hẏt yg|gỽyned. ac ywein
a ỻywelyn veibon gruffud ap. ỻywelyn. gan adaỽ y gyuoeth ystro+
| « p 202r | p 203r » |