LlGC Llsgr. 3035 (Mostyn 116) – tudalen 37r
Brut y Brenhinoedd
37r
wraged oed idaỽ a dec merchet ar hugeint A|deugein
mlyned y bu yn gỽledychu. Sef oed enweu y meibon.
Brutus taryan las oed y|mab hynaf idaỽ. Maredud.
Seissyỻ. Rys. Morud. bleiddut. Jago. bodlan. kyngar.
yspladen. gỽaỽl. Dardan. eidal. Juor. ector. kyngu.
gereint. Run asser. hỽel. A|sef oed enweu y verchet
Gloyỽgeing. Jgnogen. eudaỽs. gỽenỻian. gỽaỽrdyd
agharat. gỽendoleu. tagỽystyl. gorgon. Medlan. me+
thael. eurar Maelure. camedra. ragau. ecuba. nest
kein. stadud. ebren. blangan. auaỻach angaes. galaes
teccaf. morỽyn oed hono yn vn ynys a|hi. gỽeiruil
perweur. eurdrych. edra. anor. staydalt. egron. A|r
rei hẏnnẏ a anuones efraỽc ar siluius y gar oed yn
vrenhin yn yr eidal. Ac y|rodet yno y wyr bonhedic
dylyedogyon. A|r meibon a aethant y germania ac
asser yn dywyssaỽc arnadunt. A|phorth y|gan siluius
gantunt ac y goresgynassant a hi a|e phobyl. A|brutus
daryan las e|hun a drigyỽys yn yr ynys hon. ỽrth
lywyaỽ y kyuoeth gỽedy y dat a|deudeg|mlyned y gỽ+
ledychỽys ynteu. Ac yn ol brutus y doeth ỻeon y
vab ynteu. Gỽr a garỽys hedỽch vu hỽnnỽ. A gỽedy
gỽelet ohonaỽ y gyuoeth yn dagneuedus a adei+
lỽys dinas yg gogled yr ynys ac a|e gelwis o|e e+
nỽ e|hun kaer ỻeon Ac yn diwed y oes y|ỻesgỽys
a|r amser hỽnỽ yd erchis selyf ap dauid adeilat tem+
yl yg|kaerusalem. Ac y doeth brenhines saba y|waran+
daỽ y doethineb Ac y doeth siluius epitus yn vrenhin
yn ỻe y dat. Ac yna val y|dywespỽyt vchot wedy
ỻesgu ỻeon y kyuodes ter·uysc yrỽg y|kiỽdaỽtwyr
e|hunein. ~ ~ ~ ~
| « p 36v | p 37v » |