LlGC Llsgr. 3035 (Mostyn 116) – tudalen 96r
Brut y Brenhinoedd
96r
ac o|r diwed gỽedy daruot idaỽ drỽy y adaỽeu ef ỻygru
hoỻ jeuenctit y|wlat paratoi a|oruc y ỻyges vỽyaf a aỻỽys
a|dyuot hyt yg|gogled yr ynys. a|dechreu anreithaỽ y gỽla+
doed a gỽedy kennatau hyny y|r brenhin ynteu a|gynuỻaỽd
y hoỻ lu ac a aeth yn eu herbyn Ac a elwis ar ymlad y
dywal elynyon Ac ỽynteu oc eu bod a ymladassant a|r kiỽ+
daỽtwyr. Ac eissoes gan vod duỽ y|kiỽdaỽtwyr a oruant*
ac a gymheỻassant eu gelynyon ar ffo.
A gỽedy kymeỻ pascen ar fo ny|lafassaỽd ef ymchoelut
drachefyn y germani namyn trossi y hỽyleu a|chyrchu
hyt at giỻamỽri brenhin jwerdon. a|hỽnỽ a|e herbyny+
aỽd ef yn enrydedus A gỽedy datkanu ohonaỽ y anhyget+
uen a|e direidi y giỻamỽri. truanhau a oruc ỽrthaỽ ac adaỽ
nerth a|chanhorthỽy idaỽ a chỽynuanus y|sarhaet ar* ry
gaỽssei ynteu y gan y brytanyeit pan *duscyn kor y keỽri
odyno Ac o|r diwed gỽedy kadarnhau kytymdeithas yrydunt
paratoi ỻogeu a|wnaethant a mynet yndunt Ac y gaer
vynyỽ y|deuthant y|r tir A gỽedy honi eu dyuot y|r tir
ỽynt dros y gỽladoed. vthyr pen dragon a gymerth hoỻ
varchogyon a hoỻ wyr aruaỽc yr ynys. Ac yd a·eth parth
a|chymry ỽrth ymlad a|r gelynyon. kanys emrys wledic y
vraỽt a|oed yn glaf yg|kaer wynt Ac ỽrth hyny ny aỻei dy+
uot y|r ỻuyd A gỽedy gỽybot o|pascen a giỻamỽri hynny
a|r saesson y·gyt ac ỽynt ỻawenhau a orugant yn vaỽr
kan tebygynt bot yn haỽs vdunt gỽereskyn y|teyrnas
o achaỽs clefyt y brenhin Ac val yd|oedynt yn|y murmur
hỽnỽ ym|plith y|ỻu. nessau a oruc o|r ssaesson at pascen. Ac
ysef oed y|enỽ ef eopa a|dywedut val hyn ỽrthaỽ. beth
a rodut ti o|da heb ef y|r neb a aỻei ỻad y brenhin pascen
a dywaỽt ỽrthaỽ. pỽy bynac a eskyneu hyny yn|y vedỽl
| « p 95v | p 96v » |