LlGC Llsgr. Peniarth 11 – tudalen 245v
Ystoriau Saint Greal
245v
odyna ef a|daỽ y vrytaen y dwyn y gennyt breint y vort
gronn yr|honn a|dyly bot yn eidaỽ ef o|dylyet. a|m arglỽ+
ydes i a|deuei e|hun pany bei vn peth. nyt amgen na|m+
ynn vyth edrych ar yr vn o|r cristonogyon. ac yr aỽr gyntaf
y gỽeles hi gristaỽn hi a|beris cudyaỽ y ỻygeit rac y wel+
et yr el˄ỽeith*. ac rac meint y car hi y|duỽ ac yr anrydeda ef.
ef a|wnaeth yn garedic a|hi dwyn ỻeuuer y|deu lygat y ~
genthi ual na|bo reit idi cudyaỽ y hwyneb na|e ỻygeit rac
gỽelet cristaỽn vyth. a ỻawen iaỽn yỽ genthi hynny. a
chyn decket yỽ y ỻygeit hi yr hynny a chynt. Eissyoes
maỽr yỽ y hymdiret hi yn|y braỽt yr hỽnn a edewis idi
diua cỽbyl o|r rei a gredei y|r gret newyd. A|phan darffo idaỽ
ef eu diua ỽyntỽy ym|brytaen uaỽr ac yn|yr ynyssed ereiỻ
hyt na aỻo hi welet yr vn. yna y ryd duỽ y golygon idi.
yn|gỽbyl drachevyn. ac hyt hynny ny mynn hi welet dim.
A vnbennes heb·yr arthur myui a|wnn beth a|dywede ̷+
ist di. a|dywet ti y|th arglỽydes y gennyf|i nat ebry ̷+
vygaf|i y gret a|ordinhaaỽd duỽ drỽy y|diodefedigaeth ar
brenn y|groc yr caryat yssyd y gennyf|i arnei hi. a|dywet
y gennyf|i idi hi pan|yỽ y grist y credaf|i ac y veir y vam.
ac o achaỽs y ffals gret yssyd genthi hi y mae yn daỻes.
ac vyth ny wyl hi yny gretto y|r gỽr yr|wyf|inneu yn credu
idaỽ. a|dywet hevyt y gennyf idi hynn na|byd hi vyth ~
vrenhines ar vyng|kyuoeth i yny vo vn gret ac vn glot
| « p 245r | p 246r » |