LlGC Llsgr. Peniarth 190 – tudalen 131
Ystoria Lucidar
131
waeret yn|y daear. a|r rei gỽirion a|drych+
efir yn|y goruchelder o|dỽy asgeỻ caryat.
megys y dywedir. Y seint a|gymerant ada+
ned megys eryrot. Y rei enwir a ostyngyr
y waeret y|r ỻaỽr o bỽys y pechodeu y glyn+
assant ỽrthunt o|e hoỻ gaỻon. discipulus Ym pa ffu+
ryf yd ymdengys yr arglỽyd yno y|r etho+
ledigyon. Magister Yn|y ffuryf y bu yn|y mynyd.
Y|r rei enwir hagen yd ymdengys ef yn|y
ffuryf y dibynnaỽd yn|y groc. discipulus A vyd y
groc yno. nyt amgen no|r prenn y dibynna+
ỽd yr arglỽyd arnaỽ. Magister Na vyd na+
myn goleuni ar vod y groc gloewach no|r
heul. discipulus Paham yr barnu y mab. Magister Am
vot yn gyfyaỽn y|r neb y gỽnaethpỽyt y
sarhaet idaỽ kymryt iaỽn. kyt bont y tat
a|r yspryt glan yn|kytlauuryaỽ ac ef. discipulus A oes
yno eistedua idaỽ ynteu y eisted yndi.
megys y dywedir. Ef a eisted ar eistedua y
uedyant. Magister Crist a seif y ymlad dros y
wreicbỽys. a|gỽedy gorchyuycko y elynyon
a chymryt y wreicbỽys attaỽ yd eisted ef
| « p 130 | p 132 » |