LlGC Llsgr. Peniarth 45 – tudalen 253
Brut y Brenhinoedd
253
londer. Ar kysgu gan wenhỽyuar urenhines
gan lygru dỽywaỽl neithoryeu. Ac yna ym+
choelut a wnaeth ef dracheuyn. Ac ellỽng hy+
wel. mab. emyr llydaỽ y tagnouedu y gỽladoed
hynny. A llu freinc gantaỽ. Ac ynteu a gwyr
yr ynyssed y gyt ac ef parth|a ac ynys
prydein. Ac yd|anuonassei y tỽyllỽr ysgymun gan
uedraỽt selinx tywyssaỽc y saesson y germania
y wahaỽd y niuer mỽyhaf a gaffei hyt yn ynys
prydein. A rodi udunt parth draỽ y humyr oll. Ac yn
ychwanec y hynny. yr hyn a|rodassei Gỽrthe+
yrn gỽrtheneu y hors a hengist yn sỽyd geint
ac gỽedy cadarnhau yr ammot hỽnnỽ. y doeth
y tywyssaỽc hỽnnỽ ac ỽyth can llong yn llaỽn
o aruaỽc paganyeit gantaỽ. A gỽrhau y ued+
raỽt megys y urenhin. Ac neur daroed idaỽ
duunaỽ ac ef yr yscottyeit ar fichtyeit ar
gỽydyl yn erbyn y ewythyr. Sef oed eiryf
y lu rỽng cristonogyon a phaganyeit. Ped+
war ugein mil. Ac ar niuer hỽnnỽ y doeth yn
erbyn arthur y lan y mor y norhamtỽn. A rodi
brỽydyr galet idaỽ yn dyuot o|r llongeu yr
tir. Ac yna y dygỽydassant araỽn mab kyn+
uarch urenhin yscothlont. A gwalchmei. mab.
gỽyar ac aneiryf y gyt ac wynt. Ac yn lle
| « p 252 | p 254 » |