LlGC Llsgr. Peniarth 45 – tudalen 265
Brut y Brenhinoedd
265
Ac o|r bryttanneit y dygỽydỽys Bledris tywys+
saỽc kernyỽ ac nyt oed haỽd y rif y gyt ac ef.
AC yna yd|ymgynnullws yr holl bryt+
tanneit hyt yg caer lleon. Ac o|e kytgyng+
hor y gỽnaethant Catuan. mab. Jago yn
urenin. arnadunt. Ac ymlit Edelflet hyt
tu draỽ y humyr. Ac yna y doeth edelflet ar holl
urenhined saesson y gyt ac ef yn erbyn cat+
uan ac gỽedy eu dyuot y gyt y tangnoued+
ỽyt yn|y wed hon. Gadu y delflet o|r tu
draỽ y humyr. A chatuan yn urenhin ar holl
ynys. prydein. wedy hynny. Ac yn eidaỽ coron lun+
dein. Ac gỽedy cadarnhau hynny y·rydunt
y bu kymeint caryat a duundap y rydunt.
Ac megys bot pob peth yn gyffredin y
ryngtunt. Ac yna y diholes edelflet y wre+
ic priaỽt y ỽrthaỽ o caryat gỽreic arall
hyt na|s gadỽys yn teruyn y gyuoeth ef. A be+
ichaỽc oed y wreic. A chyrchu a oruc hi at cat
ac adolỽyn idaỽ y chymodi hi a|e gỽr. Ac gỽedy
na allỽys Catuan eu kymmot roddi trỽydet idi
yn|y lys e|hun. A gỽreic catuan heuyt oed ueich+
aỽc. A phan doeth eu hamser y ganet deu uab
udunt. Ac y dodet Catwallaỽn ar uab Catuan
ac Edwin ar uab Edelflet. Ac gwedy meith+
| « p 264 | p 266 » |