LlGC Llsgr. Peniarth 46 – tudalen 223
Brut y Brenhinoedd
223
klyỽssynt nat oed neb a allei ym·erbyn
ac emreis. ac ygyt a hynny hael oed
a gỽastat y|gỽassannaeth duỽ. a|thros
pob peth caru duỽ. a gỽironed a ỽnaei.
a chassau kelỽyd. a deỽr oed ar|y|troet.
a deỽrach ar uarch. doeth oed yn tyỽys+
saỽ llu. a|thra yttoed yn llydaỽ y|ryỽ de+
uodeu hynny a ehedynt y ỽrthaỽ y. ynys.
prydein. Sef a|ỽnaeth y saesson mynet o|gỽ+
byl hyt parth draỽ y|humyr. ac yna
kadarnhau y kestyll. a|r caeroed arna+
dunt. Canys yd oed megys kedernyt
yr estraỽn genedloed. ac yn eissỽet y|r
kyỽdaỽdỽyr. Canys gỽlat gadarnn yn+
yal oed ỽrth y|pressỽylaỽ. ac adas y aruoll
estraỽn genedyl. Canys pen pann delhynt
pob ryỽ estraỽn genedyl yno y|disgyn+
ynt yn gyntaf. ac o|gedernyt y lle
hỽnnỽ yd anreithynt y gỽladoed. ac y
lledynt y kyỽdaỽdỽyr. a gỽedy clybot o
emreis y|saesson hyt yno. ehofnach uu
| « p 222 | p 224 » |