Breudwd Rhyddiaith Gymraeg 1300-1425
English

LlGC Llsgr. Peniarth 19 – tudalen 28r

Brut y Brenhinoedd

28r

109

raỽ parth a|e heneint. Medylyaỽ
a|wnaeth pa wed yd adawei y gyuo+
eth gỽedy ef y verchet. Sef a|w+
naeth profi pỽy vỽyaf o|e ver+
chet a|e karei ỽrth rodi idi y
rann oreu o|r kyuoeth gan wr.
A galỽ attaỽ y verch hynaf
idaỽ goroniỻa. a|govyn idi pa
veint y karei hi efo. A thygu
a|wnaeth hitheu y nef a daear
bot yn vỽy y karei hi efo no|e
heneit e|hun. a|chredu a|wna+
eth ynteu hynny. a|dywedut
kan oed kymeint y karei hi
efo a hynny y rodei ynteu
draean y gyuoeth genthi hi
y wr a dewissei yn ynys pry+
dein. ac yn ol honno galỽ at+
taỽ Ragua y verch eil hynaf
idaỽ. a govyn idi pa veint y
karei hi efo. a thygu a|wnaeth
hitheu y gyuoetheu y nef a|r
daear. na aỻei hi dywedut ar
y thauaỽt leueryd pa veint
y karei hi efo. A chredu a|w+
naeth ynteu hynny. ac adaỽ
idi hitheu y rodi y|r gỽr a|dew+
issei a thraean y gyuoeth gen+
thi. ac yna y gelwis y verch Jeu+
af idaỽ attaỽ. a govyn idi pa
veint y karei hi efo. A dywe+
dut a|wnaeth hitheu y ry garu
ef eiryoet. megys y dylyei verch
garu y that. ac nat yttoed etto
yn peidyaỽ a|r karyat hỽnnỽ
ac erchi idaỽ gỽarandaỽ yn

110

graff pa veint oed hynny. ac
sef oed hynny y veint y bei
y gyuoeth a|e iechyt a|e dewr+
der. A blyghau a ỻidiaỽ a|oruc
ynteu. a dywedut ỽrthi. kann
oed kymeint y tremygassei
hi efo a hynny ual na charei
hi efo megys y karei y chw+
ioryd ereiỻ. y diuarnei ynteu
hi hyt na chaffei neb·ryỽ rann
o|r ynys y·gyt ac ỽynteu. Ny
dywaỽt ynteu na|s rodei hi
y wr ny hanfei o|r ynys o dam+
chweinyei y|r kyfryỽ wr hỽnnỽ
y herchi heb argyfreu genthi.
Hynn hefyt a gadarnhaei ef
hyt na lauuryei y geissyaỽ
gỽr idi megys y|r rei ereiỻ.
kanys mỽy y karyssei ef hi
eiryoet no|r rei ereiỻ. a hitheu
yn|y dremygu ef yn vỽy no|r
rei ereill. ac heb ohir o gyt+
gyghor. y wyrda y rodes y dỽy
verchet hynaf idaỽ y dywysso+
gyon yr alban a chernyỽ. a
hanner y gyuoeth ganthunt
hyt tra uei vyỽ ef. a gỽedy
bei uarỽ ef y kyuoeth ganthaỽ
yn deu hanner. Ac yna gỽedy
clybot o aganipus vrenhin
freingk clot. a phryt a thegỽch
cordeiỻa. anuon kennadeu a|w+
naeth o|e herchi yn wreic idaỽ.
a dywedut ỽrth y that y genna+
dwri. Ac ynteu a|dywaỽt y rodei
y verch idaỽ ef heb argyfreu gen+
thi.