Llsgr. Philadelphia 8680 – tudalen 58r
Brut y Brenhinoedd
58r
149
kiwtawdwyr ymlad. Kanys
kenedyl y brytanyeit gynt
a notteynt goresgyn peỻ deyr+
nassoed y byt yn eu|kylch
ỽrth eu hewyỻys. ac ỽrth eu
medyant e|hunein. Ac yr
aỽrhonn megys gỽinỻan
da wedy y|diwreidaỽ yn ym+
choelut yn chwerỽed. hyt
na eỻy di amdiffyn dy wlat
na|th|wraged na|th ueibon.
Ac ỽrth hynny kynnyda
ditheu giwdaỽtaỽl abaỻ ky+
nyda. Bychan a|beth y|dyeỻe+
ist di yr euegylyaỽl ymadra+
ỽd hỽnn. Pob teyrnas a|wa+
haner yndi e|hun a|diffeith+
yr. a|r ty a|syrth ar y gilyd.
Ac ỽrth hynny kanys gỽa+
hanedic yỽ dy deyrnas di.
A chanys ynuytrỽyd kiỽt+
awtaỽl ac anuundeb. a
mỽc kyghoruynt a|dywyỻ+
aỽd dy vedỽl di. Kanys sy+
berwyt ny adaỽd ytti uuud+
dhau y un brenhin. Ac
ỽrth hynny ti a|wely dy wlat
150
yn|anreithedic y gan yr enw+
iraf baganyeit saesson.
Ti a|wely di dei gỽedy ry syr+
thyaỽ ar y gilyd yr hyn a|gỽyn
dy etiuedyon gwedy ti. kanys
ỽynt a|welhant kynaỽon
aghyfyeith lewes yn medu
dy|drefyd a|th dinassoed a|th
gestyỻ ac eu hoỻgyuoeth
ac eu|medyant. ac yn druan
eu gỽrthlad ỽynteu y aỻtut+
ed. o|r ỻe ny aỻant dyuot onyt
yn anhaỽd ar eu|hendeilygdaỽt.
neu ynteu byth ny|s gaỻant.
A Gwedy daruot megys y
dywespỽyt uchot yr ysky+
munedic gotmỽnt hỽnnỽ.
a ỻawer o uilyoed o saesson
paganyeit gyt ac ef anreith+
aỽ yr ynys oỻ hayach. ef a
rodes y rann uỽyhaf ohonei
yr honn a|elwit ỻoeger y|r sae+
son. kanys drỽy y brat hỽy
y dathoed ef y|r ynys honn.
Ac yna y kilyassant y bryta+
nyeit yr hynn a|diagyssei o+
nadunt y orỻewinaỽl ranneu
| « p 57v | p 58v » |