Breudwd Rhyddiaith Gymraeg 1300-1425
English

LlGC Llsgr. Peniarth 19 – tudalen 43r

Brut y Brenhinoedd

43r

173

dyuot dros y mur hỽnnỽ. Ac
yna y gossodet treul kyffredin
ỽrth adeilyat y mur hỽnnỽ o|r
mor y gilyd. a|r mur hỽnnỽ a
barhaaỽd drỽy laỽer o amser.
ac a|etelis yn vynych y gormes+
soed y ỽrth y brytanyeit. a gỽedy
na aỻaỽd sulien kynnal ry+
uel a vei hỽy yn erbyn yr
amheraỽdyr. mynet a|oruc hyt
yn sithia y geissyaỽ porth y
gan y fichteit y oresgyn y ky+
uoeth drachefyn. A gỽedy kyn+
nuỻaỽ o·honaỽ hoỻ Jeuengtit
a dewred y wlat honno. dyuot
a|wnaeth y ynys brydein a|ỻyg+
hes uaỽr ganthaỽ. A gỽedy eu
dyuot y|r tir. kyrchu am benn
kaer efraỽc a|oruc. a dechreu
ymlad a|r gaer. a|gỽedy kerdet
y chwedyl dros y deyrnas yn
honneit yd ym·adewis y rann
vỽyaf o|r brytanyeit y rei a oed+
ynt gyt a|r amheraỽdyr ac
yd|aethant att sulyen. Ac yr hyn+
ny eissyoes ny pheidyassant yr
amheraỽdyr a|e lu a|e darpar.
namyn kynuỻaỽ gỽyr ruuein
ac a|drigyassant o|r brytanyeit
gyt ac ỽynt. a chyrchu y ỻe yd
oed sulyen. ac ymlad ac ef. Ac
yna eissyoes pan oed gadarnaf
yr ymlad y ỻas seuerus amher+
aỽdyr a ỻawer o|e lu y·gyt ac
ef. ac y brathỽyt sulyen yn ag+

174

heuaỽl. ac y cladỽyt seuerus
yg|kaer efraỽc. a gỽyr ruuein
a gynhalyaỽd y dinas ar·na+
dunt yr hynny. a|deu uab a
adewis seuerus idaỽ. Sef oed
eu henỽeu basianus a Jeta.
Basianus a hanoed y vam
o|r ynys honn. a mam y ỻaỻ
a hanoed o ruuein. a gỽedy
marỽ eu tat. sef a|wnaeth gỽ+
yr ruuein drychafel Jeta yn
vrenhin a|e ganmaỽl yn vỽy+
af ỽrth hanuot y vam o ru+
uein. Sef a|wnaeth y brytan+
yeit ynteu ethol basianus
yn vrenhin a|e ganmaỽl. ỽrth
han·uot y vam o|r ynys honn.
Ac ỽrth hynny sef a|wnaeth
y brodyr ymlad. Ac yn yr
ymlad hỽnnỽ y ỻas Jeta. ac
y cafas Basianus y vrenhin+
yaeth drỽy nerth y brytanyeit.
A C yn yr amser hỽnnỽ
yd oed gỽas Jeuangk
clotuaỽr yn ynys brydein.
Sef oed y enỽ karaỽn. ac ny
hanoed o|lin teyrned. namyn
o lin issel. Ac eissyoes gỽedy
kaffel clot o·honaỽ yn ỻawer
o ymladeu o|e dewred a|e fyn+
nyant. kychwyn parth a
ruuein a|oruc y geissyaỽ ken+
nyat y gan sened ruuein y
warchadỽ o·honaỽ ar logeu
arvordir ynys brydein rac