Llsgr. Philadelphia 8680 – tudalen 67r
Brut y Brenhinoedd
67r
185
theu ỽynt y uuchedockau
yn an|plith ninheu yn tag+
nouedus. Ac ỽrth hynny
arglỽyd kanhatta udunt
e|hunein ryuelu y·rygtunt.
Megys agatuyd y|distriỽ+
her ỽynt o gyfneỽit y cle+
fydeu y gantunt e|hunein.
Kanys nyt iaỽn kadỽ ffyd
ỽrth y neb a|uo bratỽr yn
wastat. Canys yr pan deu+
thant y saesson yn gyntaf
y|r ynys honn yn wastat
y maent yn bredychu an
kedyl* ni. Ac wrth hynny
kany dylyy di kadỽ ffyd
ỽrthunt hỽy. kanhatta di+
theu y peanda ryuelu yn
erbyn oswi|aelwin. megys
y|darffo o|r teruysc hỽnnỽ y
neiỻ ae eu ỻad ae eu|dehol
o|r ynys honn. Ac ỽrth
hynny kadwaỻaỽn a
ganhadaỽd y peanda
ryuelu ar oswi|aelwin.
Ac odyna peanda a gyn+
nuỻwys ỻu maỽr. ac a
186
aeth drỽy humyr ar tor os+
wi. a|dechreu anreithaỽ y
gỽladoed a ryuelu arnaỽ
yn|drut. Ac o|r diwed rac
agheu oswi a|gynnigyỽys
brenhinolyon rodyon o eur
ac aryant. mỽy noc y geỻit
y gredu y peanda. yr peidyaỽ
a ryuelu arnaỽ. ac ymchoe+
lut atref. A|gỽedy na myn+
nei peanda dim y gan oswi.
Ynteu a|syỻaỽd ar ganhor+
thỽy duỽ. A chyt bei lei ei+
ryf y lu no ỻu peanda. ef a
rodes brỽydyr idaỽ ger ỻaỽ
auon winned. A|gỽedy
ỻad peanda a|dec tywyssaỽc
ar|hugeint ygyt ac ef. oswi
aelwin a|gauas y uudugo+
lyaeth. A gỽedy ỻad pean+
da. kadwaỻaỽn a rodes y
ỽlffric y gyuoeth. A hỽnnỽ
a|gymerth ebba ac etberth
y ryuelu ar oswi aelwin.
Ac o arch katwaỻaỽn ỽynt
a|gymodassant. A gỽedy
eilennwi ỽyth mlyned a
| « p 66v | p 67v » |