Breudwd Rhyddiaith Gymraeg 1300-1425
English

LlGC Llsgr. Peniarth 5 (Llyfr Gwyn Rhydderch, rhan 1) – tudalen 115v

Ystoria Carolo Magno: Can Rolant

115v

225

lond verthyr yn mynet o|e gorf
hanner mei e|hun. Yd oed tur+
pin archescop yn kanu offeren o|r
meirỽ rac bronn charlymaen.
Sef y|doeth idaỽ val lleỽyc. ac y+
na y klyỽei cor o egylyonn yn
canu. ac ny ỽydat ef beth oed
hynny. a|gỽedy kerdet goruch+
elder nef o·nadunt na·chaf y*
tra|e geuyn bydin val gỽyr a
delei o gyrch ac anreith gan+
tunt yn mynet heibyaỽ. ac
ymatteb ac ỽy a oruc. a gouyn
vdunt beth a arỽedynt. Marsli
heb ỽy yd ym ni yn|y dỽyn y|v+
fernn. a|ch kornaỽr chỽithev
y|mae mihagel yn|y dỽynn y
paradỽys. a niuer maỽr gyt
ac ef. a gỽedy daruot yr offer  ̷+
en y|dyỽat turpin a hynny ar
vrys y charlymaen. bit hysbys
heb·y|charlymaen y|mae ene+
it rolond y|mae mihagel yn|y
dỽyn y|nef. a llaỽer o gristo  ̷+
nogyon y·gyt ac ef. A|r dief+
yl heb ef yssyd yn mynet ac
eneit marsli y vffernn. ac ar
hynny na·chaf batỽin yn dy+
uot at charlymaen braỽt ro+
lond. ac yn dyỽedut idaỽ cỽ+
pbyl o damỽein rolond. a m+
arch rolont gantaỽ. ac yn di+
annot yd ymhoelaỽd charly+
maen a|e holl lu. ac yn gyn+
taf dyn o|r llu charlymaen

226

a dyỽanaỽd ar rolond yn|y lle yd
oed a|e torr y vynyd. a|e dỽy vre  ̷+
ich yn groes ar y dỽyvronn.
A|e gỽynaỽ a|oruc trỽy igyon.
ac vcheneitev. ac ỽylaỽ. a diỽr+
eidyaỽ bleỽ y|varyf. a|e ỽallt.
a|dyỽedut val hynn o hyt y benn.
O|r vreich dehev y|m corff. i. y va+
ryf orev a|uu. a thegỽch holl
freinc. a|e kedernyt. a|e hyder.
a|e hamdiffynn. kledyf kyfya+
ỽnder. gleif ny phallei. lluryc
agkyffroedic. Penfestim* lleỽe+
nyd. helym milỽryaeth. kyffe+
lyb o glot y iudas machabeus.
vn gedernyt a samson. vn ryỽ
y aghev ac vn saul vrenhin.
a ionathas. Y marchaỽc gỽych+
af. a grymussaf yn ryuel. y
doethaf ymplith llu·oed. distryỽ
saracinneit. maỽred yr yscolhe+
igon. amdiffynnỽr cristonogon.
kynheilat ymdiueit. a gỽraged
gỽedỽon. ymborth achenogy+
on. kynnyddỽr eglỽyssev. kyf+
fredin y|mrodyev. ketymeith
y baỽp. tyỽyssaỽc lluoed ffydla+
ỽn. ac ar vn geir. blodev. a hy+
der. a chỽyn holl gret yn erbyn
eu gelynyon. a pham y dugum
i didi y|r gỽladoed hynn. pa delỽ
y gallaf|i edrych arnat ti yn
varỽ. paham na bydaf varỽ yn+
hev ygyt a thydi. Gỽae vi roc
trueni py wnaf|i bellach