LlGC Llsgr. Peniarth 19 – tudalen 60v
Brut y Brenhinoedd
60v
247
a|gribdeila. Yna yd eurir y
temleu. ny orfowys ỻymder
y cledyfeu. a breid vyd o cheiff
pryf germania y ogofeu. ka+
nys dial y vrat a|daỽ yn|y
erbyn. Grymhau y·chydic
o|r|diwed a|wna. a degỽm nor+
mandi neu flandrys a|e|har+
gyweda. kanys pobyl a|daỽ
y myỽn peisseu heyrn. ac y
myỽn prenn. yr honn a gymer
dial o|e henwired. Ef a atnewyd+
haa pressỽyluaeu yr hen diw+
yỻodron. a rewin yr estronyon
a ymdengys. Hat y dreic wenn
a helir oc an gardeu ni. a gỽed+
iỻ y genedyl a|degemir. Gỽed
dragywydaỽl geithiwet a|dy+
borthant. ac eu mam a|archoỻ+
ant o geibeu ac ereidyr. Yna
y darostỽg y dreigeu. o|r rei y
darostỽg y neiỻ y gyghorvynt.
y ỻaỻ a ymchoel dan wasga+
ỽt y henỽ. Odyna y dynessa
ỻeỽ y wirioned ar vreiurat rac
yr hỽnn yd ergrynant tyred
freingk ac ynyssolyon dreigeu.
Yn|y dydyeu hynny yd ym+
choelir eur o|r liliỽm a|r dyn+
haden. ac aryant a ret o gar+
neu y rei a vrefont. Y cala+
mistreit a|wisc amryuaelyon
gnuoed. a|r abit uchaf a ar+
ỽydockaa y pethau o vyỽn.
Traet y rei a|gyfarth a|drych+
248
ir. Hedỽch a|gaffant y bỽystui+
leit. Dynolyaeth a|dolurya po+
en. Ef a|hoỻtir furyf y gyfnew+
it. Hanner crỽnn a vyd. Ef a
baỻa cribdeil y barcutanot. a
danned y bleideu a|bylant. ka+
nawon y ỻeỽ a symudir yn
vorolyon bysgaỽt. a|r eryr hỽn+
nỽ a wna y nyth ar vynyd
avia neu eryri. Gỽyned a go+
cha o|e mamaỽl waet. a thy
gorineus a lad y chwe broder.
ynyssolyon dagreuoed a|gỽplaa
yr ynys. Gỽae hi flandrys o lef
y kỽynuanussyon. kanys yn+
di y dineuir emennyd y|ỻeỽ
yny bo briwedic y aelodeu oỻ.
O|e dadaỽl dylyet y gỽrthledir.
Odyna y gelwir paỽb ar bop
peth. Y plant a lauuryant ehe+
dec ar oruchelder. kanmaỽl pe+
theu newyd hagen a|drychefir.
Y|r a|vo gwar yd argywedir o
enwired yny wisgo ef y rieni.
ỽrth hynny y disgyn mynyded
y rỽymedic o danned baed coet.
a gỽasgaỽt y penfestinyaỽc.
Sorri a|wna yr alban ac yny
bo kyt·alwedic y hystlysseu y
ỻauurya y dineu gỽaet. Yg|ge+
neu hỽnnỽ y rodir frỽyn yr
hỽnn a|wneir yn arffet lydaỽ.
Eryr torr y gygreir a eura
hỽnnỽ. ac o|r trydyd nyth y ỻaỽ+
enhaa. Yna y deffry y kanaỽon
| « p 60r | p 61r » |