LlGC Llsgr. Peniarth 4 (Llyfr Gwyn Rhydderch, rhan 2) – tudalen 54v
Owain
54v
255
a|uackei e|hun a|cherdet a oru ̷+
gant ar hẏt ẏ dyd educher. a|f ̷+
fan uu amser gan owein orffo+
ỽẏs discẏnnu a|oruc ac ellỽg ẏ
varch ẏ|bori ẏ|mẏỽn dol wastat
goedaỽc a llad tan a|oruc owein
A|ffan uu baraỽt ẏ tan gan owe ̷+
in ẏd oed gan ẏ lleỽ dogẏn o|gẏn ̷+
nut hẏt ẏmphen teir nos. a|dif ̷+
flannu a|oruc ẏ lleỽ ẏ ganthaỽ
ac ẏn|ẏ lle na·chaf ẏ lleỽ ẏn dẏfot
attaỽ a|chaeriỽrch maỽr telediỽ
ganthaỽ a|ẏ vỽrỽ ger bron owe ̷ ̷+
in a mẏnet ẏ orwed ẏ am ẏ tan
ac ef. a chẏmrẏt a|oruc owein ẏ
kaeriỽrch a|ẏ vligẏaỽ a dodi golhỽ ̷+
ẏthẏon ar vereu ẏg·kẏlch ẏ tan
a rodi ẏ iỽrch oll namẏn hẏnnẏ
ẏ|r lleỽ ẏ ẏssu. ac val ẏ bẏdei owe ̷+
in ẏ·vellẏ ef a glẏỽei och waỽr
a|r eil a|r trẏdet. ac ẏn agos attaỽ
a gofẏn a|oruc owein aẏ bẏdaỽl
a|ẏ gỽnaei. Je ẏs|gỽir heb ẏ|dẏn
pỽẏ ỽẏt titheu heb·ẏr owein. di+
oer heb hi lunet ỽẏf i llaỽ·vorỽẏn
iarlles ẏ ffẏnẏhaỽn. beth a|ỽneẏ
di ẏna heb·ẏr owein. vẏg karcha+
ru heb hi o|achaỽs gỽraang a do ̷+
eth o lẏs ẏr amheraỽdẏr ac a|uu
rẏnnaỽd gẏt a|hi. ac ẏd aeth ẏ
dreiglẏaỽ lẏs arthur. ac nẏ doeth
vẏth drachefẏn. a|r kedẏmdẏeith
oed ef genhẏf i mỽẏhaf a|garỽn
o|r holl vẏt. Sef a|oruc deu o|weis+
sẏon ẏstauell ẏ iarlles ẏ|oganu
ef ẏ|m gỽẏd i. a|e alỽ ẏn dỽẏllỽr
bradỽr. Sef ẏ dẏỽedeis inheu na
allei eu deu gorff hỽẏnt amrẏs ̷+
son a|e vn gorff ef. ac am hẏnnẏ
256
vẏg karcharu ẏn|ẏ llestẏr maen
hỽn a orugant a dẏỽedut na bydei
vẏ eneit ẏ|m korff onẏ deuhei ef
ẏ|m hamdiffin i ẏn oet ẏ dẏd ac nẏt
pellach ẏr oet no threnhẏd ac nẏt
oes ymi neb a|e keissẏo ef. Sef oed
ẏnteu owein vab vrẏen. a oed di+
heu genhẏt titheu heb·ẏr ẏnteu
pei gỽyppei ẏ gỽreanc hỽnnỽ hynnẏ
ẏ deuhei efo ẏ|th hamdiffẏn di. diheu
ẏrof a duỽ heb hi. a|ffan uu digaỽn
poeth ẏ golỽẏthẏon eu rannu a oruc
owein ẏn deu hanher ẏ·rẏdaỽ a|r
vorỽẏn. a bỽẏta a orugant. a gỽedẏ
hẏnnẏ ẏmdidan hẏnẏ uu dẏd dra+
noeth. a thrannoeth gofẏn a|oruc
owein ẏ|r vorỽẏn a oed le ẏ gallei
ef caffel bỽẏt a lleỽenẏd y nos hono.
oes arglỽẏd heb hi dos ẏna drỽod
heb hi ẏ|r rẏt a cherda ẏ fford gan
ẏstlẏs ẏr afon ac ẏm phen y myn*+
ỽd ti a ỽelẏ gaer vaỽr a thẏrẏeu
amhẏl arnei a|r iarll pieu ẏ gaer
honno goreu gỽr am vỽẏt ẏỽ ac
ẏno y gellẏ vot heno ac nẏ ỽẏlẏỽẏs
gỽẏlỽr ẏ arglỽẏd eirẏoet ẏn gystal
ac ẏ gỽẏlẏỽẏs ẏ lleỽ owein ẏ nos
gẏnt. ac ẏna kẏỽeirẏaỽ ẏ varch
a|oruc owein a|cherdet racdaỽ trỽẏ
ẏ rẏt hẏnẏ welas ẏ gaer ac ẏ|r gaer
ẏ doeth owein a|ẏ aruoll a|ỽnaeth+
pỽẏt idaỽ ẏno ẏn anrẏdedus a|chẏ+
weirẏaỽ ẏ varch ẏn diwall a dodi
dogẏn o vỽẏt ger y vron a mynet
a oruc ẏ lleỽ ẏ|bresseb ẏ march ẏ
orwed hẏt na leuassei neb o|r gaer
vẏnet ẏg kẏfẏl ẏ march racdaỽ
a|diheu oed gan owein na|ỽelas
eirẏoet lle kẏstal ẏ wassanaeth
| « p 54r | p 55r » |