LlGC Llsgr. Peniarth 4 (Llyfr Gwyn Rhydderch, rhan 2) – tudalen 8r
Y gainc gyntaf
8r
29
a|r gỽaet a|ẏ dỽẏlaỽ a|bẏrỽn ẏr
eskẏrn gẏr ẏ|bron. a|thaerỽn ar ̷+
nei e|hun diuetha ẏ mab. ac ni
bẏd ẏn|taered ni an|chỽech ỽrthi
hi e|hun. ac ar ẏ|kẏnghor hỽn ̷ ̷+
nỽ ẏ trigỽẏt. Parth a|r dẏd rian ̷+
non a|deffroes ac a|dẏỽot a|ỽra ̷+
ged heb hi mae ẏ mab. arglỽẏ ̷+
des heb ỽẏ na ouẏn di ẏ ni ẏ|mab.
nẏt oes ohonam ni namẏn i
cleisseu a|dẏrnodeu ẏn ẏmda ̷+
raỽ a|thi a|diamheu ẏỽ genn ̷ ̷+
ẏm na ỽelsam eiroet uilỽra ̷ ̷+
eth ẏn un ỽreic kẏmeint ac ẏ+
not ti. ac nẏ thẏgẏaỽd ẏnni
ẏmdaraỽ a|thi. neur diffethe ̷ ̷+
eist du hun dẏ uab ac na haỽl
ef ẏnni. a|druein heb·ẏ riannon
ẏr ẏr arglỽẏd duỽ a|ỽẏr pob peth
na ẏrrỽch geu arnaf. duỽ a|ỽẏr
pob peth a ỽẏr bot ẏn eu hẏnnẏ
arnaf i. ac os ouẏn ẏssẏd arna ̷ ̷+
ỽch|i ẏ|m|kẏffes ẏ duỽ mi a|ch dif ̷+
feraf. dioer heb ỽẏ nẏ adỽn ni
drỽc arnam nẏ|hunein ẏr dẏn
ẏn|ẏ bẏt. a|druein heb hitheu nẏ
cheỽch un drỽc ẏr dẏỽedut ẏ|ỽi ̷ ̷+
rioned. Ẏr a|dẏỽettei hi ẏn dec
ac ẏn druan nẏ chaffei namẏn
ẏr un atteb gan ẏ|gỽraged. Pỽ ̷+
ẏll penn annỽn ar hẏnnẏ a gẏ ̷ ̷+
uodes a|r teulu a|r ẏniueroed.
a chelu ẏ damỽein hỽnnỽ nẏ all ̷ ̷+
ỽẏt. Ẏ|r ỽlat ẏd aeth ẏ|chỽedẏl
a phaỽb o|r guẏrda a|e kigleu.
a|r guẏrda a doethant ẏ·gyt ẏ
30
ỽneuthur kẏnnhadeu at pỽẏll
ẏ erchi idaỽ ẏscar a|e ỽreic am
gẏflauan mor anỽedus ac
a|rẏ|ỽnaethoed. Sef attep a
rodes pỽẏll. nẏt oed achaỽs
ganthunt ỽẏ ẏ erchi ẏ mi
ẏscar a|m|gỽreic namẏn na
bẏdei plant idi. plant a|ỽnn
i ẏ uot idi hi. ac nẏt ẏscaraf
a hi. O gỽnaeth hitheu gam
kẏmeret ẏ phenẏt amda ̷+
naỽ. hitheu riannon a|dẏuẏ ̷+
unỽẏs attei athraỽon a|doe ̷ ̷+
thon. a gỽedẏ bot ẏn degach
genthi kẏmrẏt ẏ phenẏt
nog ẏmdaeru a|r gỽraged.
ẏ phenẏt a gẏmerth. Sef pe ̷+
nẏt a dodet erni bot ẏn|y llẏs
honno ẏn arberth hẏt ẏm+
penn ẏ seith mlẏned. ac ẏs ̷+
kẏnuaen a oed odieithẏr ẏ
porth. eisted gẏr llaỽ hỽnnỽ
beunẏd a dẏỽedut ẏ paỽb
a delei o|r|a|debẏgei na|s gỽẏ ̷+
ppei ẏ gẏffranc oll ac o|r a attei
idi ẏ dỽẏn. Kẏnnic ẏ|ỽestei
a|phellẏnic ẏ dỽẏn ar ẏ che ̷ ̷+
uẏn ẏ|r llẏs. a damỽein ẏ ga ̷+
dei ẏr un ẏ|dỽẏn. ac ẏ·uellẏ
treulaỽ talẏm o|r ulỽẏdẏn
a|ỽnaeth. ac ẏn ẏr amser hỽn ̷ ̷+
nỽ ẏd oed ẏn arglỽẏd ar ỽẏnt
ẏscoet teirnon tỽrẏf uliant.
a|r gỽr goreu ẏn|ẏ byt oed.
ac ẏn|ẏ tẏ ẏd oed cassec. ac
nẏt oed ẏn|ẏ dẏrnas na march
| « p 7v | p 8v » |