Breudwd Rhyddiaith Gymraeg 1300-1425
English

LlGC Llsgr. Peniarth 5 (Llyfr Gwyn Rhydderch, rhan 1) – tudalen 141r

Ystoria Bown de Hamtwn

141r

327

y brenhin y|goron am y benn. a
boỽn a|e kymhỽyssaỽd am y|benn.
ac escob gris a|gant yr efferen ac
y|r allaỽr yd aethant ac ar benn  ̷ ̷
eu glinyeu yd offrymassant trỽy
euyllus da. ac ygyt ac ef tywysso  ̷ ̷+
gyon clotuorus. a guedy yr|efferen
y marchogyon a ym˄didanassant y+
rygthunt. ac y|dywedassant. arglỽyd
heb ỽynt. y|sulgỽyn yỽ hỽnn. ni a
dlyỽn marchogaeth yn meirch a|vo+
ont yn sỽiỽrn. gỽir a dyỽedut. heb
y rei trỽy dyghu y|duỽ yr hỽnn a
rodo distriỽ arnunt. ac yna deu o+
honunt a varchoccaassant deu varch
drythyll tu a|r porth. y neill o·honunt
oed a|cherdedyat uchel ganthaỽ. a|r
llall yn rygyghaỽc. ac uchel oed y|dyd.
ac ef a|vyryỽyd o benn y|tỽr dec gaf  ̷ ̷+
lach a r|ugeint. ac yna y marchogyon
a ympentyryassant y·gyt. ac ar y
plas peri arỽein arỽein eu meirch.
ac yna yd oed arỽndel yn drythyll
yn llaỽ boỽn. ac yskynnu a|oruc. bown.
y myỽn kyfrỽy a|e gorfeu eureit. ac
ymdidan a oruc a|r|brenhin. a|thra yt  ̷ ̷+
toyd ef yn yr ymdidan hỽnnỽ y|march  ̷ ̷+
ogyon ereill a|dugassant hynt o vlaen
boỽn yn lledrat. ac yna nyt ymarbe  ̷ ̷+
dỽys neb o·honunt a|e|gilyd. ac yna
y|gỽahardỽys y brenhin ỽynt hyt
na|thorrei neb o·honunt aelodeu y gi  ̷ ̷+
lid. arglỽyd heb·y boỽn am ffolineb

328

y dyỽedy ny ellir hynny. eissoes. tra
yttoed boỽn yn ymdidan a|r brenhin
y marchogyon a raculaenassant tri
gyrua march ymblaen boỽn. ac yna
boỽn trỽy digoueint brathu arỽndel
ac ysparduneu dan y voli. y|fford a
gymerth hyt pann gyuodes dỽst y
fford a|e vỽrỽ y gan y|gỽynt yn ỽybyr
rygthaỽ a|r gỽyr gỽyr. welỽch heb y
brenhin meint y kam y mae yn|y
ỽneuthur y|r march ac ny bu hir hyt
pan edeỽis ef y|deu varchaỽc o was  ̷ ̷+
cỽyn agos y deir milltir. ac yn|y diỽed
ef a|e hedeỽis oll. ac ymdidan a|oruc
ef a|e varch a|dyỽedut ỽrthaỽ. march
heb ef beth a|daruu it. drỽc myn duỽ
y kerdeist hyt hyn. kanys pann er  ̷ ̷+
lityassam y rỽnssieit clotuorus. a
phan ledeis. i. tenebres. yna ti a|e he  ̷ ̷+
deweist. ac yna kyntaf ti a|m urdeist.
a|phan gigleu y march y arglỽyd yn|y
voli yn well noc y kauas o|e broui.
y fford a gymerth a racdaỽ y|kerdaỽd
hyt na bu eiroet ederyn a|allei y|gan  ̷ ̷+
lyn o achaỽs y kanmaỽl a|oruc y|ar  ̷ ̷+
glỽyd arnaỽ. ny orffỽyssaỽd hyny
deuth ar gyffinid tref y tat. ac yna
seuyll a|oruc y march ac edrych a|oruc
boỽn ar y tir yn|y gylch ac adnabot
y vot yn dyuot y|dref y tat. oe a|duỽ
tat kyuoethaỽc heb·y boỽn llyma y
tir y dylyei uyn|hat bot yn geitỽat
trỽy nerth duỽ. ac yma y|paraf. i.