LlGC Llsgr. Peniarth 19 – tudalen 83v
Brut y Brenhinoedd
83v
379
A|r vydin a|ossodassant y ga+
dỽ y carcharoryon a|orchym+
ynnassant y rickart a bedwyr.
a|thywyssogaeth y rei ereiỻ a
orchymynnỽyt y gadỽr Jarỻ
kernyỽ. a borel yn gyttywys+
saỽc idaỽ. a|r ruueinwyr kyr+
chu a|wneynt heb geissyaỽ na
ỻunyaethu eu gỽyr na|e byd+
inaỽ. namyn oc eu hoỻ lauur
keissyaỽ gỽneuthur aerua
o|r|brytanyeit. hyt tra yttoed+
ynt ỽynteu yn bydinaỽ eu
gỽyr ac yn eu hamdiffyn e
hunein. Ac ỽrth hynny gan
eu gỽanhau yn ormod ỽynt
yn dybryt a goỻassynt eu
carcharoryon. pei ˄na damchwein+
ei eu tyghetuen udunt damu+
nedic canhorthỽy ar vrys. ka+
nys gỽittart iarỻ peitaỽ gỽe+
dy gỽybot y tỽyỻ hỽnnỽ a
doeth a their mil ganthaỽ. ac
o|r|diwed gan nerth duỽ a|r
canhorthỽy hỽnnỽ y bryta+
nyeit a oruuant. ac a dalys+
sant eu haerua y|r tỽyỻwyr.
ac eissyoes yn|y gyfrangk kyn+
taf y collassant ỽy lawer. Ka+
nys yna y kollassant yr ar+
derchaỽc dywyssaỽc borel o
cenoman yn kyfaruot ac e+
uander brenhin siria. yn vra+
thedic gan y|waeỽ y dygỽyd+
aỽd. Yna y coỻassant heuyt
380
pedwar gỽyr bonhedigyon. Nyt
amgen. hirlas o birỽn. a|meuric o
gaer geint. ac alidỽc o dindagỽl.
a hir uab hydeir. Nyt oed haỽd
kaffel gỽyr lewach no|r rei hyn+
ny. ac yr hynny ny choỻassant
y brytanyeit eu gleỽder. namyn
oc eu ỻafur kadỽ eu karchar+
oryon. ac o|r diwed ny aỻassant
y ruueinwyr godef eu ruthyr.
namyn yn gyflym adaỽ y maes
a fo parth a|e pebyỻeu. a|r bryta+
nyeit yn eu herlit. ac yn|gỽneu+
thur aerua o·honunt. Ac ny
pheidassant yn eu daly ac yn
eu ỻad. yny ladyssant ultei a
chadeỻ senedwr. ac euander vren+
hin siria. A gỽedy caffel o|r bry+
tanyeit y vudugolyaeth honno
ỽynt a anuonassant y karchar+
oryon hyt ym paris. a|r rei a
dalyssant o newyd ỽynt a|e
hymchoelassant att arthur
eu brenhin o|e dangos gan adaỽ
gobeith hoỻ vudugolyaeth i+
daỽ. kanys niuer mor vychan
a|hỽnnỽ a gaỽssynt uudugoly+
aeth ar y saỽl elynyon hynny.
A |Gỽedy gỽelet o les amher+
aỽdyr ruuein meint y goỻ+
et ar dechreu y ryuel. trỽm a
thrist vu ganthaỽ. a medylyaỽ
a|oruc peidyaỽ a|e darpar am
ymlad ac arthur. a mynet y
dinas awuarn y aros porth
| « p 83r | p 84r » |