Breudwd Rhyddiaith Gymraeg 1300-1425
English

LlGC Llsgr. Peniarth 4 (Llyfr Gwyn Rhydderch, rhan 2) – tudalen 64v

Geraint

64v

391

a|ẏ llẏgeit ẏnẏ uẏd ẏ gwaet ẏn
hidleit. Sef a|wnaeth ẏ uorỽẏn
o dolur ẏ dyrnaỽd; dẏuot tra+.
cheuẏn at wenhỽẏuar ẏ·dan
gỽẏnaỽ ẏ dolur. Hagẏr iaỽn
heb·ẏ gereint ẏ goruc ẏ corr
a|thi. Mi a|af heb·ẏ gereint ẏ
vẏbot pỽẏ ẏ marchaỽc. Dos
heb·ẏ gwenhỽẏuar. Dẏuot
a oruc gereint at ẏ corr. heb
ef pỽẏ ẏ marchaỽc. Nẏ|s dẏ+
wedaf iti heb ẏ corr. Mi a|ẏ go+
uẏnnaf ẏ|r marchaỽc e hun
heb ẏnteu. Na ouẏnhẏ mẏn
uẏg kred heb ẏ corr. Nẏd vẏt
un anrẏdet di ac ẏ dẏlẏhẏch
ẏmdidan a|m arglỽẏd i. Miui
heb·ẏ gereint a ẏmdideneis a
gỽr ẏssed gẏstal a|th arglỽẏd di.
a|throssi penn ẏ uarch a oruc m
parth a|r marchaỽc. Sef a oruc
ymordiwes ac ef a|ẏ daraỽ ẏn|ẏ
gyueir ẏ traỽssei ẏ uorỽẏn ẏnẏ
oed ẏ gỽaet ẏn lliwaỽ ẏ llenn
a oed am ereint. Sef a oruc
gereint dodi ẏ laỽ ar dỽrn ẏ
gledẏf a|chẏmrẏt kẏghor ẏn|ẏ
uedỽl ac ẏstẏraỽ a oruc na* oed
dial ganthaỽ llad ẏ corr. a|r mar+
chaỽc aruaỽc ẏn|ẏ gael ẏn rat
a heb arueu. a dẏuot dracheuẏn
a|oruc ẏn ẏd oed wenhỽẏuar.
Doeth a|fỽẏllaỽc ẏ medreist heb
hi. arglỽẏdes heb ef mẏui ettỽa
a|af ẏn|ẏ ol gan dẏ gennat ti. ac
ef a|daỽ ẏn|ẏ diwed ẏ gẏuanhed
ẏ caffỽẏf i arueu. ae eu benfic
ae ar ỽẏstel ual ẏ caffỽẏf ẏm·bra  ̷+
ỽf a|r marchaỽc. Dos ditheu heb
hi ac nat ẏmwasc ac ef ẏnẏ gef  ̷+
fẏch arueu da. a goual maỽr
uẏd genhẏf i ẏmdanat heb hi

392

ẏnẏ gaffỽẏf chỽetleu ẏ vrthyt.
Os bẏỽ uẏdaf. i. heb ef erbẏn
prẏd·naỽn ẏ·uorucher ti a|glẏwẏ
chỽetleu o dianghaf. ac ar hẏnnẏ
kerdet a oruc. Sef ford ẏ kerdas  ̷ ̷+
sant is laỽ ẏ llẏs ẏ|ghaer llion.
ac ẏ|r rẏt ar vẏsc mẏnet drỽod.
a gỽastattir teg erdrẏm aruchel
a gerdẏssont ẏnẏ doẏthont ẏ di  ̷ ̷+
nastref. ac ẏm penn ẏ dref ẏ
gỽelẏnt caer a|chastel. ac ẏm penn
ẏ dref ẏ doethant. ac ual ẏ kerd  ̷ ̷+
ei ẏ marchaỽc trỽẏ ẏ dref. ẏ kẏ  ̷+
uodei tẏlỽẏth pob tẏ ẏ gẏuarch
gwell idaỽ ac ẏ grassaỽu. a|ffan
doeth gereint ẏ|r dref ẏ ẏdrẏch
ẏm pob tẏ ẏ geissaẏaỽ neb adna  ̷ ̷+
bot neb o|r a welei. ac nit atwae  ̷ ̷+
nat ef neb na neb ẏnteu. ual
ẏ gallei ef caffael kẏmỽẏnas o
arueu aẏ o uenfic ae ar vẏstẏl.
a fob tẏ a|welei ẏn llaỽn o wẏr ac
arueu a meirch. ac ẏn llathru tar  ̷+
ẏaneu. ac ẏn ẏsleẏpanu cledẏueu.
ac ẏn golchi arueu ac ẏn pedoli
meirch. a|r marchaỽc a|r uarcho+
ges a|r corr a gẏrchẏassant ẏ
castell a oed ẏn|ẏ dref. llawen oet
paỽb vrthunt o|r castell. ac ar
ẏ bẏlcheu ac ar ẏ pẏrth ac ẏm pob
kẏueir ẏd ẏmdoruynẏglẏnt ẏ
gẏuarch gỽell ac uot ẏn llawen
vrthunt. Seuẏll ac edrẏch a
oruc gereint a uẏdei dim go  ̷+
hir arnaỽ ẏn|ẏ castell. A ffan
vẏbu yn hẏspẏs ẏ drigaỽ. edrẏch
a oruc ẏn|ẏ gẏlch. ac ef a welei ar
dalẏm o|r dref hen llẏs atueiledic
ac ẏndi neuad drẏdoll. ac vrth
nat atwaenat neb ẏn|ẏ dref mẏ+
net a|oruc parth a|r hen llẏs a
gỽedẏ dẏuot o·honaỽ parth a|r