Rhydychen, Llsgr. Coleg yr Iesu 111 (Llyfr Coch Hergest) – tudalen 96r
Ystoria Carolo Magno: Chronicl Turpin
96r
401
y pagan enwi crist. y gouynnwys ynteu
pỽy y crist y credy di idaỽ. Mab duỽ heb·y
Rolant. yr hỽnn a|anet o|r wyry. ac a|diodefa+
ỽd yn|y groc. ac a|gladỽyt ym med. A|r try+
dyd dyd a gyuodes o ueirỽ. ac aeth drachefyn
ar deheu duỽ. Nynnheu a|gredỽn heb y ka+
ỽr panyỽ un duỽ yỽ creaỽdyr nef a dayar
ac na bu idaỽ na mab na|that. Namyn me+
gys na enis neb euo na enis ynteu neb
Ac ỽrth hynny y uot ynteu yn vn|duỽ ac
nyt yn|dri. Gwir a|dywedy di heb·y rolant
y uot ef yn|vn duỽ. Pan dywedy ditheu nat
tri ef yd|wyt yn|cloffi y|th fyd. O chredy di
yn|y tat. cret yn|y uab ac yn yr yspryt glan.
kanys duỽ dat yỽ ef a mab ac yspryt glan.
vn duỽ teir|person. Os tat y dywedy di. heb+
y fferracut bot duỽ a|r mab yn|duỽ. a|r ys+
pryt glan yn|duỽ. tri duỽ ynt yr hynn nyt
gỽir. ac nyt un|duỽ. Nac ef heb·y rolant na+
myn vn duỽ ac yn|dri y|pregethaf ynheu
euo. Ac un. a|thri. Ẏ teir person gogyfoet
ynt a|gogyffelyp. vn ryỽ y tad. ac vn ryỽ
y mab ac un ryỽ yr yspryt glan. Ẏn|y per+
sonyeu y mae priodolder. ac yn|y dỽywolya+
eth y|mae unolder. Ac yn|y medyant y|mae
kyffelybrỽyd. vn|duỽ drindaỽt a|adolant
yr egylyon yn|y nef. A thri a|welas y·vre+
ham. ac vn a|adoles. Dangos ym hynny
heb y kaỽr. Pa|delỽ y|mae tri yn vn. Dan+
gossaf ytt heb·y rolant trỽy y creadurye+
it dayraỽl. Megys y mae tri pheth yn|y de+
lyn pan|uo yn kanu. nyt amgen keluydyt
a|thanneu a|ỻaỽ. Ac eissoes vn delyn yỽ.
val hynny y|mae tripheth yn duỽ. tat a
mab. ac yspryt glan. ac vn duỽ yỽ ef.
Ac ual y mae yn|yr amandlys tripheth.
nyt amgen risclin a|phlisgin. a chneỽyỻ+
in. ac eisoes vn amandlys yỽ. Val hynny
y mae teir person yn vn duỽ. Yn|yr heul
y mae tripheth. Gỽynn. ac eglur. a|gwres+
saỽc yỽ. Ac eissoes vn heul yỽ. Ẏn olwyn
y uenn y|mae tripheth. Both. a breichyeu.
a chylch. Ac eisoes un olỽyn yỽ. Ẏnot
dy hun y mae tripheth. Corff. ac aelodeu.
ac eneit. Ac eissoes vn dyn ỽyt. Val hyn+
ny y mae duỽ yn vn ac yn dri. Mi a|dyaỻaf
402
heb·y fferacut. bot duỽ weithon yn vn
ac yn|dri. Ny ỽn hagen pa|furyf y genis
y tat mab mal y dywedy di. A gredy di heb+
y rolant gỽneuthur o|duỽ adaf. Credaf
heb y caỽr. Mal na anet adaf heb·y rolant
y gan neb. Ac eissoes ef a|anet meibon i+
daỽ ef. veỻy ny anet duỽ dat. y|gan neb
Ac eissoes ef a|anet y uab ef yn|dỽywaỽl
mal y mynnỽys kyn noc amseroed ual
na eỻir y datkanu. Da y|dywedy heb y
kaỽr. Pa|delỽ y bu dyn yr hỽn a|oed duỽ
ny ỽn. i. dim o·honaỽ. Yr|hỽnn a|ỽnaeth
nef a|dayar heb·y rolant. ac a|greỽys pob
peth o|dim. euo a|wnaeth y mab yn dyn.
heb defnyd dyniaỽl namyn o|e gyssegre+
digaeth yspryt ef. Ẏn|hynny y ỻauury+
af i heb y kaỽr. pa delỽ heb gyt gỽr y ge+
nit mab o wyry mal y dywedy di. Duỽ
heb·y rolant ẏr hỽnn a ffuruaỽd adaf heb
gyt gỽr a|gỽreic. ynteu a|ỽnaeth geni y
uab e|hun heb gyt gỽr o|r|wyry. Ac ual
ual y ganet adaf heb uam o duỽ dat. val
hynny y ganet y vab ynteu o uam heb
dyn yn dat. kanys y ryỽ anedigaeth
hỽnnỽ a|wedei y duỽ. Diruaỽr gewi+
lyd yỽ gennyf vi heb y kaỽr. pa delỽ y
genit o|wyry heb dyn. Ẏr hỽnn heb·y
rolant a|ỽna tyuu pryuyn y myỽn y ffa+
en. ac a|wna tyuu pryf creadur y|myỽn
y prenn. a ỻawer o bysgaỽt ac adar. a
gỽenyn ac anadred. heb gyt gỽryỽ. Yn+
teu a|wnaeth y|r uorỽyn wyry heb gyt gỽr
geni duỽ a dyn. Kanys y neb a|ỽnaeth y
dyn kyntaf mal y dywedeis i yn haỽd
heb nebryỽ gyt dyn. Haỽd y gaỻỽys yn+
teu wneuthur geni y uab o|r wyry heb
gyt gỽraỽl. Ef a aỻei heb y caỽr y eni
ef o|r wyry. ac os mab duỽ eissoes yỽ ef
mal y dywedy di ny aỻei uarỽ o neb ryỽ
uod kany byd marỽ duỽ byth. Da y
dywedy heb·y rolant gaỻu o·honaỽ ef
geni o|r wyry. A chanys ganet megys
dyn ỽrth hynny marỽ uu mal dyn. ka+
nys paỽp o|r a aner a|vyd marỽ. A cha+
nys credadỽy yỽ y anedigaeth credadỽy yỽ
y varỽolyaeth. neu y|diodefedigaeth.
| « p 95v | p 96v » |